السجن 3 سنوات و6 أشهر للملاكم المتهم بالتعدي على أسرة في الشيخ زايد

قضت  محكمة جنح الشيخ زايد، المنعقدة اليوم السبت، بالسجن 3 سنوات و6 أشهر  للملاكم المتهم بالتعدي على أسرة أمام مقر نادي “بيفرلي هيلز” بالشيخ زايد.

إحالة المتهم لمحكمة الجنح

وفي وقت سابق، كانت جهات التحقيق المختصة، أحالت الملاكم المتهم بالمشاركة في الاعتداء على أسرة، أمام نادي “بيفرلي هيلز”، إلى محكمة الجنح وحددت 8 نوفمبر كأولى جلسات محاكمته.

أقوال الملاكم المتهم بالتعدي على أسرة بالشيخ زايد

وحصلت “تليجراف مصر” على نص التحقيقات مع المتهم، والتي جاءت أقواله كالتالي:

س: ما اسمك:

ج: اسمي “محمد.م.ع”

س: ما ظروف ضبطك وإحضارك وعرضك علينا تحديدًا؟

ج: اللي حصل إن إخواتي عصام وعلي زمايل المجني عليه حازم في مدرسة “نيو فيشن” بالشيخ زايد، وهما يوم الواقعة (15 أكتوبر 2025) اتخانقوا بعد المدرسة بس خناقة أطفال يعني، وبعدين زمايلهم تدخلوا وبعدين كل واحد فيهم روّح بيته وبالليل في اليوم دا كان إخواتي علي وعصام بيلفوا بعربية "الجولف كار" وكانوا قريبين من بيت حازم وهما بيلفوا لقوا حازم وقريبة “سعيد” بينادوا عليهم.

وبعدين إخواتي راحوا لهم و"سعيد" فضل يتكلم مع إخواتي ويقول لهم اللي إنتوا بتعملوه مع حازم دا ماينفعش وإخواتي قالوا له إحنا ماعملناش أي حاجة، وفضل “سعيد” يهددهم علشان هو أكبر منهم ويقول لهم لو حاجة ثانية حصلت لحازم أنا هزعلكم، وبعدين إخواتي قالوا لهم إحنا لازم نمشي دلوقت علشان المفروض كانوا هيروحوا يجيبوا أخويا الثالث “محمود” من عند “بيفرلي هيلز”، وسعيد وحازم قالوا لهم تمام ماشي روحوا هاتوا أخوكم وإحنا هنجي لكم هناك عند نادي “بيفرلي هيلز” وهنكمل كلامنا، وفعلًا علي وعصام إخواتي كلموني على التليفون وحكوا لي كل اللي حصل.

وأضاف: قالوا لي إن سعيد وحازم عاوزين يقابلوهم عند نادي “بيفرلي هيلز”، وبعدين أنا قلت لعلي وعصام إخواتي روحوا بيتنا إنتوا وإنا هروح النادي علشان أتكلم معاهم، وفعلًا سعيد وحازم جم عند النادي، وأنا اتقابلت معاهم أمام بوابة النادي، وفضلت أتكلم مع سعيد وأقول له ماينفعش وإنت كبير كدا إنك تتخانق وتهدد إخواتي وهما صغيرين وسعيد قال لي وهما ماينفعش اللي هما بيعملوه مع قريبي حازم دا واشتد الكلام بينا وبعدين سعيد زقني في صدري وأنا زقيته برضو وبعدين أنا وسعيد مسكنا في تي شيرتات بعض ومجتش ناحية حازم خالص لحد ما حازم قعد يزعق ونادى على والده “أحمد محمد عبدالخالق” ولقيته جه عندي وأنا ليقتهم ثلاثة وجریت ومعرفش إيه اللي حصل بعد كدا خالص، وعرفت بعد كدا إن أبويا مصطفى خبط فيهم بالعربية، وبعدين عرفت إن الشرطة بتدور عليّ علشان الضبط والإحضار الصادر ضدي من النيابة العامة، وأنا روحت سلمت نفسي في القسم وهو دا كل اللي حصل.

س: ما صلتك بالمجني عليهم أحمد محمد عبدالخالق، وحازم أحمد محمد عبدالخالق، وسعيد إسماعيل سعيد، وهل ثمة أي علاقة أو خلافات؟

ج: بالنسبة لأحمد محمد عبدالخالق فهو والد حازم، وأنا معرفوش، وأعرف إن حازم زميل إخواتي علي وعصام وهما على طول بيتخانقوا معاه في المدرسة، و"سعيد" قريب حازم وأول مرة أشوفهم ساعة الواقعة.

س: وما صلتك بالمتهمين: مصطفى عصام الدين علي عبداللطيف، وعلي مصطفى عصام الدين، وعصام مصطفى عصام الدين؟

ج: مصطفى أبويا، وعلي وعاصم إخواتي.

س: ما طبيعة الخلافات بينك وبين المجني عليهم سالفي الذكر؟

ج: مفيش خلافات غير إنهم زمايل إخواتي علي وعصام في المدرسة وبيتخانقوا مع بعض في المدرسة خناقات عيال صغيرة، وأول مرة أشوفهم ساعة الواقعة وشديت مع سعيد في الكلام ومسكنا تي شيرتات بعض، وبعد كدا جریت وسبتهم علشان سعيد قابلهم عند بيت حازم وقال لهم ملكوش دعوة بحازم علشان مزعلكمش.

س: ومتى نشأت تلك الخلافات تحديدًا؟

ج: بالنسبة لإخواتي وحازم معرفش الخلافات بينهم من قد إيه، بس أنا عرفت إنهم اتخانقوا مع بعض مرة واحدة يوم الواقعة الصبح في المدرسة، وبالنسبة لي أنا شديت مع سعيد في الكلام لما قابلتهم بالليل عند نادي “بيفرلي هيلز” وسبتهم وجیرت علشان سعيد قابلهم عند بيت حازم وقال لهم ملكوش دعوة بحازم علشان مزعلكمش.

س: وكيف نما إلى علمك بشأن تلك الخلافات؟

ج: علشان إخواتي علي وعصام حكوا لي إنهم اتخانقوا مع حازم في المدرسة الصبح وبعدين قابلوا سعيد وحازم عند بيت حازم بليل ومش متذكر الوقت بالضبط، وسعيد هناك قال لهم ملكوش دعوة بحازم علشان مزعلكمش.

إقرأ أيضاً..

اليوم، استكمال محاكمة الملاكم المتهم بالتعدي على أسرة في الشيخ زايد