"كنت رايح أجيب هدومي"، عبدالرحمن يروي تفاصيل عام ونصف من مطاردات البلطجية بالزاوية (فيديو)

عبدالرحمن شاب من منطقة الزاوية الحمراء، تعرض لمسلسل اعتداءات بدأ بسبب دفاعه عن ضيف كان في منزله، وتطور إلى مطاردات وهجمات متكررة استمرت لأكثر من عام ونصف، ما دفعته لترك منطقته والعيش بعيدًا عن أسرته.

الشاب عبدالرحمن يروي تفاصيل الاعتداء عليه 

وقال الشاب عبدالرحمن إن “الواقعة بدأت من أكتر من سنة ونصف، يومها كان عندي واحد صاحبي، وفيه حد جاري اسمه يوسف هو وأصحابه كانوا عايزين يعتدوا عليه، وأنا قولت لهم دا ضيفي ومينفعش حد يكلمه، ومن ساعتها وهما مترصدينلي، وكل شوية يتعرضولي".

وأكمل عبدالرحمن، في تصريحاته لـ"تليجراف مصر": “مش مرة ولا اتنين، هجموا عليا قبل كدا أنا وأخويا وخالي، وجابوا كلب وعوروني، وعملنا محاضر وكل دا خلص بصلح علشان إحنا جيران، بس هما مكملين ولا محترمين صلح ولا كبير”.

تفاصيل الواقعة الأخيرة: كنت هموت 

وأضاف الشاب: “كنت رايح أجيب هدومي من عند أمي عند سلم عبود، وما كنتش داخل في مشكلة مع حد، وفجأة لقيتهم طالعين عليا بالسلاح الأبيض، طبعًا جريت من المكان، بس هما جريوا ورايا واتجمع معاهم ناس تانية، بقوا حوالي 8 أفراد تقريًبا، وضربوني في رأسي ضربات جامدة، وفي عيني، أنا فجأة بقيت كلي دم ومكنتش شايف قدامي".

أنا عايز حقي

واختتم الشاب حديثه: “أنا مش طالب غير حقي بس، أنا سايب المنطقة من زمان بسبب الناس دول، ومش بزعل حد ولا بعمل مشاكل مح حد، بس هما مش عاوزين يسيبوني، ولو الموضوع مكملش قانوني هيموتوني في يوم من الأيام”.

والدة الشاب تروي كواليس الواقعة 

وبمقابلة والدة الشاب عبدالرحمن قالت وهي تبكي: “ابني غلبان، والله العظيم غلبان، دا ساب البيت علشان ميعملش مشاكل، وقعد عند جده في المطرية بقاله 7 شهور، بس هم مش عاوزين يسيبوه وبيراقبوه، وكل ما ييجي ناحية المنطقة تحصل له مصيبة”.

اقرأ أيضًا: 

"قرايب مراتي"، ضبط المتهمين بالاعتداء على شاب في القاهرة

أمن الدقهلية يكشف تفاصيل فيديو الاعتداء على شاب باستخدام سلاح أبيض

بعد استغاثة والدته، ضبط المتهم بالاعتداء على شاب في الإسكندرية