"3 لتر ميه داخل الرئة"، والد السباح جون ماجد يروي اللحظات الأخيرة في حياته (خاص)

وقعت مأساة كبيرة داخل نادي الغابة في مصر الجديدة بالقاهرة، بعدما لفظ السباح جون ماجد “من ذوي الهمم” صاحب الـ18 عاما، أنفاسه الأخيرة أثناء تلقيه التدريب داخل حمام السباحة الخاص بالنادي، بسبب الإهمال الذي تعرض له من المدربين، تلك الواقعة التي أعادت للأذهان واقعة السباح يوسف محمد، التي شغلت الرأي العام في الفترة الماضية.

والد السباح جون ماجد يروي اللحظات الأخيرة في حياته

وكشف والد السباح جون ماجد حجم المأساة التي عاشها فلذة كبده داخل النادي، قائلًا: “التعامل مع ابني في إنقاذه كان بشكل اجتهادي، مفيش خبرة ولا منقذين، هم حاولوا معاه على أد ما يعرفوا إنهم ينيموا الولد وبيضغطوا على بطنه، وابني طلع شويه مياه لكن كان لسه فيه مياه تاني في جسمه وتحديدًا على الرئة، ودا اللي قاله تقرير المستشفى، إن كان فيه حوالي 3 لتر مياه على رئته، وهم مكانوش مدركين إن الولد قلبه متوقف، لأن لما روحنا المستشفى قالوا إن قلبه متوقف”.

مفيش أي إسعافات في المكان

وأضاف والد جون، في تصريح لـ"تليجراف مصر": “مفيش أي إسعافات في المكان، وأنا قولت فى النيابة مفيش أي حاجة إطلاقًا للإنعاش داخل النادي، وبعد كدا لما المدربين لقيوا إن مفيش فايدة و الولد لسه مفيش أي حاجة، ابتدوا يشيلوه، ودا بردو اجتهاد غلط لأنهم معندهمش خبرة، وقعدوه على كرسي غلط تمامًا”.

المدربون تسببوا في تركز المياه في الرئة 

وأكمل والد جون: “ اللي عملوه المدربين دا تسبب في تركيز المياه على الرئة، ودا كلام دكاترة الرعاية، ودا طبعًا أدى لتلف أجزاء في الرئة، دا كدا رقم واحد للمشاكل اللي قابلتنا، رقم اتنين إن طول الفترة اللي فيها القلب مكنش شغال، أثر على المخ للأسف ضمور للخلايا بتاعت المخ”.

الولد وقع على دماغه أثناء نقله للمستشفى 

وأوضح والد لضحية: “زود الإهمال إهمال تاني إن وهم شايلين ابني ورايحين بيه على المستشفى اللي جنب النادي، للأسف الشديد الولد وقع منهم بتقل جسمه كله على دماغه من ورا ودماغه اتفتحت، وللأسف اللي أخدوه على المستشفى دول مش منقذين، دول كابتن من اللي بيعلمهم بس معندهمش درايا بالأمور دي، ودا بسبب إن مفيش منقذين أصلًا في النادي”. 

القبض بدأ ينبض ببطئ

وأفاد والد جون: “لما وصلوا المستشفى دخلوا بيه بسرعة على الطوارئ، وطبعا الطوارئ عملت الإسعافات و الإجراءات اللازمة من جهاز الصدمات و الشفط والكلام دا، وبالفعل يشاء القدر إن القلب بدأ ينبض بس نبض ضعيف، وقالوا طلعوه بسرعه على الرعاية، وحطوه على جهاز التنفس الصناعي”.

هنعمل فتحة حنجرية

واختتم والد جون حديثه قائلًا: “كانت فيه مضاعفات كتير عمالة بتحصل، قالولنا إحنا مش هنقدر نكمل للأسف على جهاز التنفس الاصطناعي لأن بدأ يحصل ضمور فى القصبة الهوائية وهنضطر نفتح فتحة حنجرية علشان نوصل الهواء للرئة بشكل مباشر، وطبعا أمه وافقت وقالت نعمل اللي شايفينه صح، وكتبنا إقرار بالكلام ده ووافقنا، لكن بعدها جالنا الخبر المؤسف إن جون توفى، وأنا بوجه اتهاما كاملا لإدارة النادي والمدربين بسبب عدم وجود منقذين ولا إسعافات”.

اقرأ أيضًا:

والد السباح جون ضحية نادي الغابة: المدرب أهمله، ومكنش فيه إسعافات عشان تنقذه

بعد مأساة يوسف، التحقيق في واقعة وفاة السباح جون بنادي الغابة

التصريح بدفن جثمان السباح جون ماجد