استمرار حبس المتهم بإطلاق النار على مدير "جولدن جيم"

قررت جهات التحقيقات المختصة، استمرار حبس المتهم بإطلاق النار على مدير “جولدن جيم”، 15 يومًا، بعد إلغاء قرار الحبس.

وفي وقت سابق، كشفت زوجة رجل الأعمال “محمد.ع” تفاصيل وكواليس صادمة في واقعة إطلاق النار على مدير “جولدن جيم” بمنطقة الشيخ زايد بمحافظة الجيزة، مؤكدة أن ما جرى جاء نتيجة دفاع زوجها عن نفسه، مطالبة الجهات المختصة بتفريغ كاميرات المراقبة المحيطة بمكان الواقعة لكشف ملابساتها كاملة.

تفاصيل الواقعة

وقالت زوجة رجل الأعمال المتهم في واقعة الاعتداء على الديزل لـ"تليجراف مصر": “جوزي راجل محترم وعنده 53 سنة، وعنده 3 بنات، وكل الناس بتشهد له بالاحترام والأدب، ومش عارفة ليه الديزل وإخوته بيقولوا عليه سوابق وبلطجي”.

عقارات الشيخ زايد

وأضافت: “محمد جوزي والديزل صحاب من زمان، وبينهم عيش وملح، لكن الديزل معملش حساب لكل ده، وعمل لجوزي كمين، والكاميرات موضحة كل حاجة حصلت بالظبط، وده اللي بنطالب النيابة بيه إنّها تفرّغ كاميرات المراقبة”.

طلقة خاطئة

وأوضحت: “كل الناس بتتهم جوزي بالتعدي على الديزل، لكن الحقيقة غير كده، والطلقة طلعت بالغلط من السلاح أثناء دفاعه عن نفسه، خصوصًا إن جوزي اتعرض لاعتداء وحصل له ضرر كبير، وعنده إصابات كتير في جسمه، من بينها خلع في الكتف وكدمات وجروح متفرقة”.

خلفيات سابقة

وتابعت: “المشكلة بدأت قبل الواقعة بـ3 أيام، لما جوزي دخل يحل مشكلة تخص ابن واحد صاحبه وبعض المتدربين في الجيم، والمشكلة اتحلت وقتها، لكن لما الديزل رجع وعرف باللي حصل، الكلام ما عجبوش وكبر الموضوع، ورفض دخول الأولاد التمرين”.

وأضافت: "الديزل هو اللي صعّد الأزمة بعد ما كانت خلصت، وكلم جوزي في التليفون وقال له: إزاي تحل مشكلة وأنا مش موجود."

واستكملت: “الديزل طلب من حد من الشباب يتصل بجوزي، وكلمه وقال له مش هدخل العيال الجيم، فجوزي رد وقال له: إنت مكبر الموضوع ليه دي عيال صغيرة وحقك عليا، لكنه استفزه وقال له: لو راجل تعالى دخلهم”.

وأردفت: “جوزي راح له لوحده علشان يتعاتبوا في مكان بعيد عن الجيم، لأنه كان مدي أمان باعتبار إنهم أصحاب، لكنه فوجئ إنهم عاملين له كمين، واتعدوا عليه بالضرب ومع الديزل 3 أشخاص”.

واختتمت بقولها: “جوزي معاه سلاح مرخص، وطلعه وضرب طلقات في الهواء علشان يبعدهم عنه ويحمي نفسه ومكنش قاصد يأذي حد نهائي، لكن الديزل وقعه على الأرض وركب فوقه، والطلقة خرجت بالغلط وأصابته في رجله، وإصابته بسيطة الحمد لله”.

وأكدت زوجة رجل الأعمال في ختام حديثها تمسكها بمطالبة الجهات المختصة بسرعة تفريغ كاميرات المراقبة المحيطة بمكان الواقعة، مؤكدة أن التسجيلات ستكشف الحقيقة كاملة وتوضح ما تعرض له زوجها من اعتداء على يد الديزل ومن عاونه.

اقرأ أيضًا:

رجل أعمال يطلق 5 طلقات على صاحب "جولدن جيم" بالشيخ زايد

جريمة بلا رحمة تهز موقف جامعة القاهرة