محمد سامي: محمد رمضان "فتوة الشعبيين" مثل فريد شوقي

أرجع المخرج محمد سامي، نجاحه الدائم مع الفنان محمد رمضان وسبب ارتباطه بالعمل معه، إلى “موهبة” الثاني المهمة، و"الكاريزما" التي يملكها، وهو مصنف “فتوة الشعبيين” مثلما بقي فريد شوقي في ذلك التصنيف طوال تاريخه الفني.

وقال سامي خلال استضافته ببرنامج "أسرار" مع الإعلامية أميرة بدر على قناة النهار، "محمد رمضان ممثل مهم وموهبة مهمة، ولكن مهما كان فهو في احتياج لفريق عمل قوي ومخرج قوي، هو عنده كاريزما لكن مش مسئول عن كل العناصر".

نجاح استثنائي

أضاف سامي، "اشتغلت مع غادة عبد الرازق والسقا وتامر حسني، لكن شغلي محمد رمضان كان نجاحا استثنائيا، بسبب الكيميا الراكبة أوي بيننا، وبنفهم بعض بالإشارة".

استطرد، "محمد رمضان طيب ومش بيفكر ينجح مع حد غيري عشان يثبت حاجة معينة لأنه مش بالشر ده، وهو نجم مبالغ في نجوميته، وعارف إنه ناجح دايماً".

محمد رمضان "فتوة الشعبيين

أضاف المخرج، "محمد رمضان متصنف فتوة الشعبيين لأن فريد شوقي فضل كده طول عمره، وأنا ضد تغيير جلد الفنانين، لأن أحمد زكي فيه حاجات مصدقتوش فيها، رغم أني أقل من إني اقيمه، لكن الأستاذ عادل إمام هو الأنجح على الإطلاق، وهو البهجة والانبساط ووظف نفسه حلو وعمل كل حاجة".

وبشأن إنتاج جزء ثان من مسلسلهما “جعفر العمدة” قال سامي، "جعفر العمدة مالوش إلا جزء، فكرة الجزء التاني فكرة المنتج محمد السعدي وكنا رافضينها أنا ورمضان، وكتبت منه 17 حلقة ومحبتهوش، لأن ليه أعيد أجزاء وتكرار لما ممكن أعمل حاجة تاني وأنجح بيها".