بعد تصريح "رموني برا النادي"، دلفي الأهلي يرد: "عالجنا مرسي لوجه الله"

ثارت حالة من الجدل بعدما أطلق لاعب نادي دلفي الأهلي، محمد مرسي، استغاثة مؤثرة عقب  الاستغناء عنه، بسبب إصابته بالرباط الصليبي أثناء فترة الإعداد ولعب مباراة ودية مع ناديه.

أول تعليق لنادي دلفي الأهلي بعد أزمة اللاعب

في محاولة لكشف تفاصيل ما جرى، تواصلت “تليجراف مصر”، مع مدير الكرة في نادي دلفي الأهلي، حمدي السيد، الذي كشف راوية أخرى تختلف عن رواية الاعب قائلًا: “رواية اللاعب اللي قالها مكنتش قبل 3 أسابيع، وكنا واخدين أصلاً القرار إنه يمشي، فعملنا ماتش ودي وهو بيلعب اتخبط”. 

علاج بـ5000 جنية

وأضاف حمدي، “بعد الماتش الودي بلغناه إنه هيمشي، فقالي يا كابتن أنا رجلي وجعاني قلتله طب روح اكشف، بعد ما كشف قالي يا كابتن أنا محتاج جلسات لمدة أسبوعين.. فقلتله عايز كام يعني؟.. قالي عايز 5000 جنيه، وبعتله أنا من معايا 5000 جنيه”.

فسخ التعاقد مع اللاعب

وتابع في حديثه قائلا: “بعد كده اطمنت عليه وسألته.. يا ابني في حاجة في ركبتك الدكتور بيقول نعمل أشعة؟.. فرد وقالي.. لا يا كابتن أنا مفيش حاجة بس الدكتور بتاعكم بتاع النادي عايز يطلعني إن أنا مصاب عشان أمشي، بس أنا رجلي مفيهاش حاجة. قلتله يعني أنت رجلك مفيهاش حاجة؟ قالي لا. قلتله خلاص ربنا يكرمك بقى، ومضى معايا فسخ التعاقد”.

عملية جراحية على حساب النادي رغم فسخ التعاقد

وأكمل حمدي، “بعد ما مشي من النادي وخلص العلاج الطبيعي، تواصل معايا وقالي أنا رحت لدكتور تاني، فسألته حصل إيه وكل ده كان مشي خلاص بس عملنا كده لله.. فرد عليا قالي لي يا كابتن أنا عايز أعمل أشعة رنين وأروح قلتله أعمل ومفيش مشكلة، بعد ما عمل قالي يا كابتن أنا رحت لدكتور واحد قالي معندكش حاجة وواحد قالي عندك رباط صليبي، فقلتله أنت دلوقتي مش على ذمة النادي هشوفلك أنا اللي أقدر أعملهولك، المهم عملنا العملية على حسابنا”.

تأهيل بـ20 ألف جنية 

بعد إجراء اللاعب عملية الرباط الصليبي لم يكتف بذلك، فوفقا لرواية مدير الكرة اللاعب قام بطلب مبلغ مالي مجددًا قائلًا: “ انا هعمل تأهيل بـ20 ألف جنيه، فرد عليه قائلا تأهيل إيه بـ 20 ألف جنيه؟.. ما أنت خلاص خلصت العملية وعملتهالك على حسابنا لوجه الله..وقلتله لا أنا هوديك على دكتور بتاع تأهيل تبعي وأنا هتعامل معاه.. فرد وقالي لا لا يا كابتن أنا عايز أروح دكتور بياخد 12 ألف جنيه في الشهر، قلتله مفيش الكلام ده إحنا عملناله العملية بعد ما مشي، ومفيش نادٍ في مصر بيعمل عملية بعد ما لعيب بيمشي، وبنبعتله فلوس كل شهر”.

رواية لاعب نادي دلفي الأهلي

وفي وقت سابق، قال اللاعب محمد مرسي لاعب نادي دلفي الأهلي في تصريحات خاصة لـ "تليجراف مصر": “أنا كنت في فترة إعداد مع النادي وكنت بلعب ماتش ودي وجالي إصابة، ولما رحت أكشف على رجلي في وقتها، طبيب النادي ضحك عليّ وقال لي إن أنا عندي جزع في رجلي، وإني محتاج راحة لمدة 3 أسابيع وهرجع أحسن من الأول، وكل اللاعبين اللي بيلعبوا معايا كانوا شاهدين على الكلام ده".

وأضاف: “ورجعت بعدها للتمرين مع زمايلي وجالي مدير الكرة بالنادي وقالي إن النادي عايز يفسخ التعاقد معايا، وده كان بالنسبة ليا صدمة عشان القرار ده اتاخد قبل ما القيد ما يقفل بـ 12 يوما”.

تفاصيل استغاثة لاعب دلفي الأهلي

وأكمل: “في وقتها قعدت اترجي مدير الكرة وقلت له: ”إزاي النادي يعمل معايا كدا ده أنا لسا مصاب وهروح فين دلوقتي والقيد خلاص هيقفل كمان كام يوم"، وقالي: هو النادي شايف كدا شوفلك أي حته بعيد عن النادي".
وقال: “وقتها كنت داخل على الأسبوع الـ 3 من فترة العلاج بعيدا عن النادي وقررت أروح أشوف دكتور أكشف عنده، ولما روحت طلب من شوية تقارير طبية كنت عملتها في النادي ولما كلمت دكتور النادي كانت المفاجأة لما قالي: ”أنت مسيرتك انتهت وعندك رباط صليبي".

وأشار إلى أن دكتور النادي أخبرة بإصابته قائلا: “انتوا ازاي تخبوا عني حاجه ذي كده، والدكتور قفل معايا في وقتها، واكتشفت إن النادي فسخ التعاقد معايا عشان عندي رباط صليبي، ومرضيش يقلي غير بعد ما فسخوا العقد بتاعي ورحت عند دكتور تاني أكشف”.

رعاية دلفي الأهلي

يذكر أنه في سبتمبر 2024، أنهى النادي الأهلي إجراءات رعاية نادي دلفي، أحد أندية القسم الثاني بالإسكندرية، لمدة 5 مواسم، بهدف تطوير الفريق بدمج ناشئي الأهلي (2003/2004) للاستفادة من مواهبهم وتأهيلهم.

اقرأ أيضا:

تسجيلات صوتية، الأمن يكشف ملابسات استغاثة طالبة من تهديدات عمها بالشرقية

الأمن يفحص استغاثة مهندس بعد ادعائه التعرض لاعتداء ببني سويف