"السواق نط وسابه يموت".. وفاة شاب بسيارة شركة حراسة في مدينة نصر

طالبت والدة الشاب حسين محمود حسن، البالغ من العمر 19 عامًا، بفتح تحقيق عاجل ومحاسبة المتسببين في وفاة ابنها الذي لقي مصرعه أثناء عمله بإحدى شركات الأمن والحراسات بمدينة نصر بعد حادث مروع وقع مع عدد من زملائه بطريق الهايكستب.

تفاصيل الواقعة

وقالت والدة الشاب لـ"تليجراف مصر": “ابني كان مقدم على شغل عن طريق النت وروحت معاه الشركة في الحي الثامن بمدينة نصر، مضى عقد سنة وإدّوه الزي الرسمي كان فرحان إنه هيبدأ شغل جديد، الشركة كانت موفرة عربيات تاخدهم من نزلة قليوب، واشتغل 5 أيام، بس في اليوم الخامس جالي تليفون من الإسعاف بيقولولي ابنك توفي”. 

وأضافت الأم وهي تبكي: "العربية وقعت من على منحدر عند الهايكستب والسواق نط منها وساب الشباب جوا، ابني كان قاعد ورا خالص اتخبط في سقف العربية حصله تهتك في الكبد والطحال ونزيف في البطن، توفي الساعة 5 المغرب ودفناه يوم 25 يناير.

وتابعت: “الشركة معملتش أي حاجة لا اعتذار ولا أي حاجة، يوم العزا قالولي هندفع 3 شهور وخلاص، ابني كان نفسه يخطب وبيصرف على نفسه، آخرتها تمنه عندهم 3 شهور”.

توقيت الحادث

وأكدت الأم أن الحادث وقع يوم 24 يناير وأن جميع الشباب المصابين تتراوح أعمارهم بين 19 و25 سنة مضيفة: “المفروض يتأكدوا من السواقين اللي شايلين أرواح الناس، الله أعلم السواق كان بيتعاطى ولا لأ، بس هو قال بنفسه خفت أقع بالعربية فنطّيت”.

وأشارت إلى أن ما يتردد عن القبض على السائق مجرد كلام غير مؤكد حتى الآن، قائلة: “عايزة حق ابني أنا فقدت ابنين في أقل من 5 شهور الكبير مات غرقان والتاني راح في حادثة شغل، نفسي آخد حق ابني قبل ما أموت”.

مش هتنازل عن حق ابني 

وأوضحت أن المحامي عماد الصباغ سيتولى حاليًا اتخاذ الإجراءات القانونية ضد الشركة والسائق، مؤكدة أنها لن تتنازل عن حق نجلها، “حق ابني مش هيضيع حسين مات وأنا مش هسكت”.

اقرأ أيضًا:

مصرع شخص وإصابة 3 أخرين في حادث تصادم سيارتين نقل بإدفو

انقلاب سيارة ربع نقل في ترعة المريوطية بالبدرشين