"هجموا علينا بعربيتين".. أسرة شاب بنها تروي كواليس واقعة الملابس النسائية

شهدت قرية ميت عاصم التابعة لمركز بنها بمحافظة القليوبية، واقعة صادمة شغلت الرأي العام المصري بعد تعرض الشاب “إسلام” للإجبار على ارتداء ملابس نسائية وتصويره مقاطع فيديو ونشرها بمواقع التواصل الاجتماعي.

والدة الضحية: بنتي مريضة سكر وإسلام كان شغال بالحلال

وقالت والدة الضحية إن ابنها البالغ من العمر 25 عاماً هو العائل للأسرة ويعمل بجد وتعب، قائلة: "ابني شغال في شركة، وفي أيام إجازته بيشتغل في الطابونة عشان يوفر لقمة العيش، إحنا ناس غلابة وفي حالنا".

وعن كواليس الأزمة، فجرت الأم مفاجأة لـ"تليجراف مصر"، قائلة: "البنت هي اللي راحت له وقالت له أنا عايزة أتجوزك وبحبك.. رد عليها وقال لها يا بنتي أنا معييش اتجوز، أنا على أد حالي، لكن هي صممت". 

وأضافت: "فجأة لقيت 15 واحد داخلين علينا بعربيتين، وشدوه من وسطنا، مسكت رجليهم وقلت لهم استنوا إخواته، استنوا لما نشوف فيه إيه، لكنهم زقوني وزقوا أبوه وخدوه غدر".

والد إسلام: جولنا بـ 15 واحد وخدوه غدر

وبمقابلة والد الضحية، روى لحظة الهجوم على منزله قائلًا: "جولنا بعربيتين فيهم حوالي 15 واحد، دخلوا البيت وخدوه، حاولنا نمنعهم بس كانوا كتير، إحنا ناس مسالمة وعمرنا ما عملنا مشاكل مع حد".

الجيران: إسلام محترم وعمره ما عاكس بنت

وتقابل محرر “تليجراف مصر” مع إحدى جيران الضحية، والتي دافعت عن أخلاقه قائلة: "إسلام ده أرجل واحد في البلد، لا بيشرب مخدرات ولا عمره عاكس بنت ولا قعد على قهوة.. ده إنسان في حاله ومن الشغل للبيت".

وتابعت بصرخة استغاثة: "لو ليهم حق كانوا راحوا للحكومة، إنما اللي عملوه ده بلطجة.. لبسوه قميص نوم وبدلة رقص وجرسوه في وسط البلد، ده يرضي ربنا؟".

شاهد عيان: كان واقف ميت من الصدمة ومبيشربش مخدرات

وأضاف أحد شباب المنطقة تفاصيل مؤلمة عن حالة إسلام أثناء الواقعة قائلًا: "الناس بتقول ده كان سكران أو واخد مخدرات، وأنا بأكد إن إسلام عمره ما شرب سيجارة.. هو كان واقف ميت مفيش رد فعل من هول الصدمة ومن المادة اللي أجبروه يشربها".

وأكمل: "إحنا بنطالب بحقه، العالم كله شاف الفيديو، ده حق مجتمعي مش حق إسلام بس.. إزاي يتهان بالشكل ده ويتصور ويتنشر عرضه، لو في قانون كان جاب حق البنت لو هي ليها حق، مش يلبسوه لبس حريمي ويضربوه بالأقلام".

مطالبة بالعدل 

واختتمت الأسرة والجيران حديثهم بمناشدة الأجهزة الأمنية والنيابة العامة بتوقيع أقصى عقوبة على المتهمين الـ 9 الذين شاركوا في الواقعة، مؤكدين أن ما حدث هو "تمثيلية انتقامية" لا تليق بدولة القانون، وأن إسلام وقع ضحية لمؤامرة بدأت بإغواء البنت وانتهت بإذلاله وتصويره في وضع مهين لكرامته ولأسرته.

اقرأ أيضًا: 

العمدة يروي تفاصيل تدخله في واقعة ميت عاصم: ضربته قلم عشان أهدّي الناس

مخدرات تحت التهديد.. ماذا حدث لضحية "بدلة الرقص" في شوارع بنها؟

عقوبات رادعه تنتظر المتهمين بإجبار شاب على ارتداء "قميص نوم" بالشارع