نظراته غريبة لمراتي.. اعترافات المتهم بالاعتداء على فرد أمن كومباوند بالتجمع (انفراد)

لقطة من فيديو الاعتداء على فرد أمن بالتجمع الخامس

A . .A

حصلت “تليجراف مصر”، على نص أقوال “معتز” رجل الأعمال المتهم بالاعتداء على فرد أمن داخل كومباوند بالتجمع، وجاءت اعترافاته كالآتي:

س: ما هي تفصيلات إقرارك؟

ج: أنا مالك في الكومباوند فيلا وبيني وبين فرد الأمن دا مشاكل سابقة من قبل ما أخلص تشطيب فيلتي، ودا عشان بيركن الناس قدام بيتي، ولما عربيتي بتتخبط مبيقوليش، وكذا مرة طلبت يمشوه أو ينقلوه بيقول لي لأ عشان بيأكل الكلاب وبيسقي الزرع لجاري، وآخر مرة مشوه 3 شهور ولما رجع أنا قولت له يا أنا يا إنت، وضربته بالأقلام على وشه وبالشلوط في بطنه وشتمته هو والشركة لأني حسيت إني مضطهد.

س: ماذا حدث بعد اعتدائك على المجني عليه؟

ج: لقيت جاري خارج بالأيفون بتاعه وبيصورني وبيقولي "يا هلا يا هلا أنا مستني اليوم دا من زمان" حسيت بحقد دفين أنا قولت له بلاش إنت لأن كل المصايب دي من تحت راسك وفضلت أشتمه وزقيته عشان هو كان بيهجم عليا، وفي وسط الزحمة كنت بكسر الترابيزة اللي موجودة والكرسي اللي كان قاعد عليه فرد الأمن وكنت بشتم أي حد استفزني وبعدها سبتهم ودخلت البيت، وبعد كدا طلعت اخدت عليتي ومشيت خالص.

س: ما هو سبب ومناسبة تواجدك بالمكان والزمان سالفي الذكر؟

ج: أنا ساكن ومالك في كمبوند سوديك فيليت وامبارح لما شوفت علي رجع تاني في نفس مكانه مقدرتش اتمالك أعصابي ونزلت ضربته وشتمته وشتمت كل واحد كان بيستفزني.

س: ما هي طبيعة العلاقة بينك وبين كل من علي ومجدي؟

ج: علي يبقي فرد الأمن المسئول عن المكان اللي أنا ساكن فيه وأنا من ضمن الفلل بتاعته ومجدي يبقي جاري الملاصق لي، وفي ما بينا مشاكل بسبب أنه عايز يبقي المسيطر على المكان وبحس أن الشركة متواطئة معاه جدا جدا إلى أبعد الحدود.

س: ما هو المقصود بأن الشركة متواطئة مع المدعو مجدي؟

ج: هو أنا بشوف أن الشركة بتنفذله كل طلباته وكل اللي هو عايزه بيعملوه وكلمته مسموعة في الشركة أوي مع إنه جار زيه زي المفروض ميبقاش في أي اختلاف ما بينا.

س: وما هي طبيعة الخلافات التي بينك وبين المجني عليه علي؟

ج: هي مشاكل كثير سابقة بدأت من قبل ما أخلص تشطيب وكانت أول مشكلة بسبب إن علي كان بيركن الجار عندي في الجراج، وأنا كنت لسه مركب الرخام في اليوم، لسه منشفش وتاني مشكلة كانت عربيتي اتخبطت ومقاليش، وكان بيخلي العربيات اللي واقفة تبع جاري تقف قدام بيتي مش قدام بيت جاري، وكنت بحس بنظرات غريبة منه لمراتي.