"كنت بصرف عليه وهددني وطلب 3 مليون جنيه" رحمة محسن تكشف تفاصيل جديدة في قضية طليقها (خاص)

كشفت التحقيقات تفاصيل جديدة في واقعة تسريب مقاطع مخلة خاصة بالمطربة رحمة محسن، والتي أثارت جدلًا واسعًا على مواقع التواصل الاجتماعي خلال الفترة الماضية، بعدما تقدمت ببلاغ تتهم فيه طليقها الثاني بالوقوف وراء تصوير ونشر تلك المقاطع.

التحقيقيات مع رحمة محسن

وحصلت “تليجراف مصر”، على نص التحقيقات في القضية، وجاءات أقوال رحمة محسن كالتالي:

س: ما هو مضمون البلاغ المقدم منك؟

ج: أنا بشتغل مطربة وكنت بغني في الأماكن المغمورة، من حوالي 3 سنين ونصف، وأنا بغني في المهندسين، لقيت واحدة اسمها حنان جاتلي وقالتلي عايزة رقمك علشان شغل وبعد كده أحمد كلمني وقالي عايزك في شغل واتقابلنا وعرفني بنفسه وقالي إنه شغال ظابط في مديرية أمن قنا.. وبعد كده اتخطبنا، وقعدنا مخطوبين حوالي 5 شهور… وبعد كده اتجوزنا في عدم حضور أهله لأنه كان بيقول في بينهم خلافات واستمرت العلاقة الزوجية بينا حوالي 4 شهور.

س: من أين استقيتي شهرتك؟

ج: في الأول كنت بغني في الكافيهات ونزلت فيديو على السوشيال ميديا والفيديو عمل انتشار واسع على مواقع التواصل الاجتماعي… وبدأت الناس تطلبني في الحفلات والأفراح ومن هنا ابتديت اشتهر.

س: حددي لنا طبيعة عملك؟

ج: أنا مطربة

س: متي بدأ نشاطك في الأعمال الفنية؟

ج: منذ عام 2021.

س: ما الفترة التي امتهنت فيها ذلك النشاط؟

ج: حوالي 4 سنين.

س: ماهي مؤهلاتك العلمية؟

ج: أنا حاصلة على بكالوريوس موسيقى عربية من أكاديمية الفنون التابعة لوزارة الثقافة عام 2017.

س: وهل التحقت بعمل عقب أن أنهيت دراستك مغايراً للنشاط الفني؟

ج: اتجوزت وقعد في البيت بس لما حصل مشاكل واتطلقت من جوزي الأولاني، نزلت اشتغل على عربيات قهوة في الشيخ زايد، لمدة سنة ونص وبعد كدة بدأت أغني في الكافيهات.

س: وما هي طبيعة وظروف حياتك المعيشية قبل الالتحاق بالعمل في مجال الفن؟

ج: كانت ظروفي صعبة لأني اتجوزت وأنا عندي 20 سنة، وقعدت في البيت لحد ما اتطلقت وبدأت اشتغل على عربيات قهوة زي ما قلت لحد ما ربنا كرمني في موضوع الغناء.

س: وماهي حالتك الاجتماعية؟

ج: مطلقة.

س: اذكري لنا عدد زيجاتك؟

ج: اتجوزت مرتين.

س: متي تزوجتي الزيجة الأولى؟

ج: في عام 2015.

س: سم لنا اسم زوجك الأول؟

ج: اسلام السيد حنفي عبد الكريم.

س: متي تزوجت من المذكور؟

ج: في 25/2/2015.

س: ماهي الفترة الزمنية التي استغرقتها تلك الزيجة؟

ج: احنا اتخطبنا لمدة سنتين واتجوزنا لمدة 8 سنوات.

س: وماهي ظروف وملابسات ذلك الزواج؟

ج: هو كان بيدرسلي في الأكاديمية.. وبعد كده اتقدملي واتجوزنا جواز صالونات وكان في بينا مشاكل طول مدة الزواج.

س: ماهي الفترة الزمنية التي استغرقتها تلك الزيجة؟

ج : 8 سنوات.

س: وما هي طبيعة العلاقة فيما بينكما خلال تلك الفترة؟

ج: كانت كلها مشاكل.

س: وما هي سبب تلك المشاكل؟

ج: احنا كان في بينا مشاكل في العلاقة الحميمية وكنا بنروح لدكاترة علشان الموضوع ده.

س: متى تزوجتي الزيجة الثانية؟

ج: في 6/12/2023.

س: سم لنا اسم زوجك؟

ج: "أحمد ف ا" .

س: وماهي ظروف وملابسات ذلك الزواج؟

ج: أنا اتعرفت عليه من خلال إني كنت بغني في أماكن وكافيهات، وهو بعت واحدة علشان تأخذ رقمي و بعد كده كلمني وقالي عايزك في شغل… وقالي إنها حفلة عيد ميلاد وبعد كده نشأت صداقة بينا وطلب إننا نتجوز و بعد كده أنا طلبت منه إني اتعرف على أهله ورفض وقالي إنه في بينه وبين أهله مشاكل على الميراث وقالي لما تيجي فرصة مناسبة هيعرفني عليهم… وبعد كده فضلنا أصحاب حوالي 3 أشهر وبعد كده اتخطبنا لمدة شهرين واتجوزنا بعدها.

س: ماهي الفترة الزمنية التي استغرقتها تلك الزيجة؟

ج: حوالي خمسة أشهر.

س: وما هي طبيعة العلاقة فيما بينكما خلال تلك الفترة؟

ج: كانت الدنيا مش أحسن حاجة.

س: هل من ثمة خلافات نشبت بينك وبين المشكو في حقه؟

ج: أيوه.

س: ومتي نشأت تلك الخلافات؟

ج: من بداية الجواز.

س: حدثينا عن أسباب تلك الخلافات؟

ج: علشان هو كان بيكلم بنات طول فترة الجواز بينا، وكان شخص غير مسؤول وكان معندوش شقة وكان قاعد عندي في البيت وحتى مجبليش شبكة أو دفعلي مهر… يعني اتجوزني ببلاش وعايش في بيتي وأنا اللي كنت بصرف عليه حتى مصروفه الشخصي أنا الي كنت بصرف عليه وهو كان دايما بيقولي إن دي فترة مؤقته وأول ما مشاكل الورث هيرجع لي فلوسي بس ده محصلش.

س: هل كان هناك مساع للصلح فيما بيتكم.

ج: أيوه كان في وكنا ناويين إننا نرجع تاني بعد ما أخلص مشاكلي مع طليقي الأولاني.

س وما سبب ذلك؟

ج: هو فضل يعيط وقعد يقولي إنه بطل علاقاته النسائية وإن أهله رامينه وقاسيين عليه وكنا هنرجع فعلا لبعض.

س: متى انتهت رابطة الزوجية؟

ج: في 11/4/2024.

س: وما هو السبب المباشر في إنهاء العلاقة الزوجية بينكما؟

ج: لسوء سلوكه علشان هو طول الوقت عايز يشرب خمور وعايز يسهر في أماكن مشبوهة وأنا كنت بصرف عليه على طول من يوم ما عرفته.

س: هل لديك أبناء من المذكور؟

ج: لا

س: وما هي تفاصيل شكواك؟

ج: اللي حصل إني يوم 24 أكتوبر 2025، جالي رسالة من رقم إماراتي ومضمون الرسالة كانت عبارة عن فيديو لي أثناء العلاقة الزوجية بيني وبين زوجي الأول.. والفيديو ده تم اجتزاء أجزاء منه بحيث إن أنا اللي أكون ظاهرة فيه بس ومكتوب تحت الفيديو اللي مبعوتلي عبارة “مدفوع فيه 3 مليون لغاية دلوقتي”.. وتحتها على طول عبارة قدامك 18 ساعة؛ وبعد كده قبل ما المدة دي تخلص لقيت إن في ناس شغالين معانا في مجال الفن بدأت يوصلهم الفيديو ده من نفس الرقم.

 وبعد حوالي 10 ساعات لقيت كمية رسائل جايالي من ناس معرفهمش بيسألوني.. ويقولي إيه الفيديو اللي نازل على النت ده؛ وبعدها الفيديو بدأ ينتشرة وبعد كده في رقم كويتي بعتلي رسالة مضمونها “دي كانت قرصة ودن”..وابتدأ الفيديو ينتشر زي الفيرس علي جميع المواقع ومنصات التواصل الاجتماعي، ويوم 26 / 10 / 2025،  أنا روحت مباحث الإنترنت اللي في مديرية أمن الجيزة وعملت بلاغ هناك وقيد برقم 2 أحوال بتاريخ  2025 /10 /20.

س: متي اتصل علمك بذلك؟

ج: يوم 24/10/2025  وأنا كنت قاعد في البيت.

س: من كان بصحبتك آنذاك؟

ج: كنت معايا إخواتي وماما.

اقرأ أيضًا:

طليق رحمة محسن في التحقيقات: "كانت على علاقة بشاب وماسك عليها فيديوهات" (خاص)

ننشر أمر إحالة طليق رحمة محسن المتهم بتسريب مقاطع خاصة لها (خاص)