أمينة شلباية تثير الجدل بإيتيكيت أكل زبادي السحور

أثار مقطع فيديو نشرته خبيرة الموضة والإيتيكيت أمينة شلباية، عبر صفحتها على موقع “فيسبوك” يتضمن طريقة أكل الزبادي في السحور خلال شهر رمضان، جدلًا واسعًا على منصات التواصل الاجتماعي.

أمينة شلباية دائمًا ما تثير الجدل، بسبب نشر مقاطع تقول إنها لتعليم فن الإيتيكيت في الأكل والشرب.

وعن إيتيكيت أكل علبة الزبادي في سحور رمضان، قالت شلباية إن “هناك بعض الأساليب التي يتبعها الآخرين تعتبر غير صحيحة ولا تمت للإيتيكيت بصلة”.

وأضافت "أنتوا زودتوها من اللي بشوفه في السحور في الزبادي، الإيتيكيت ليه طريقة أكل بنضافة وحلاوة، أول حاجة لازم يتقدم معاه طبق، علشان لما أشيل ورقة الزبادي مسبهاش في أي مكان إلا الطبق".

وتابعت "لما أخلص الزبادي بمنتهى النضافة مسبش المعلقة جوا العلبة لأنها بتبقى خفيفة وتاخدها وتقع، لازم أحطها على الطبق.. عرفتوا فايدة الطبق".

إيتيكيت أكل الزبادي

وأكملت "مش لازم وأنا قاعدة أمسك العلبة في إيدي كده، باكلها وهي ثابتة في مكانها، وباكل من على الوش مش لازم أخبط لجوا، وأغرف حبة صغيرين علشان أكل المعلقة على مرة واحدة".

وأتمت شلباية "مبفهمش الناس اللي بتقلب الزبادي جوا ولا أكل الحبة اللي في آخر علبة الزبادي، مفيش حاجة اسمها كده خد علبة تانية يا سيدي، حاجات بسيطة أوي بس مهمة، هو ده الصح وهو ده الإيتيكيت".

تعليقات ساخرة

وانهالت التعليقات الساخرة على مقطع إيتيكيت أكل الزبادي لأمينة شلباية، حيث قالت ندى علي "إحنا بنخلص العلبة بسرعة علشان نلحق الفجر قبل ما يأذن مش فاضيين للكلام الفاضي دا".

وعلقت آمال سيد “مفيش وقت إحنا بنفضي العلبة في بوقنا من غير معلقة وبردو بنلحس الورقة”، وكتب آخر "ارحمينا بالله عليكي حتى الأكل صعبتوه على الناس".

وقالت أمل عماد "هقول لحضرتك الفكرة في إننا بنقلبها، أستاذة أمينة إحنا بنحط على الزبادي سكر ونقلبه، معلش بردو هتقل على حضرتك ليه أرمى اللي في الآخر وأخد غيرها، هو من احترام النعمة إني مارميهاش".