"الموجة سحبتنا".. أقوال صِهر أحد المكفوفين ضحايا الغرق بالإسكندرية

تستكمل "تليجراف مصر" نشر التحقيقات في قضية غرق شقيقين مكفوفين أثناء التنزه بأحد شواطئ الإسكندرية، تلك الواقعة التي حدثت قبل نحو 8 أشهر من الآن، لكن طالبت شقيقة الضحايا بفتح ملف التحقيق مرة أخرى.

وكشف محمود، شقيق زوجة أحد الضحايا، تفاصيل يوم الواقعة بداية من خروجهم جميعا للتنزه، حتى وفاة الشقيقين غرقا.  

أقوال شقيق الزوجة “محمود”

وجاءت أقوال محمود شقيق زوجة أحد الضحايا والذي كان معهما يوم الحادث كالتالي:

س: ما معلوماتك عن الواقعة؟

ج: يوم الواقعة 11/8/2025، كلموني وقالوا لي تعالى اقعد معانا شوية ونروح البحر نعمل عيد ميلاد لبنت أخو مراتي، أنا كنت سايب الشغل وحالتي النفسية وحشة بسبب وفاة والدتي، فوافقت.

روحت قعدت معاهم يومين، ويوم الإتنين صحينا بدري، حضرنا الأكل ولبس البحر، وروحنا الشاطئ بعربية وصلت بينا قريب من الشط.

قعدنا شوية، وبعدها قالي أخو مراتي ننزل البحر، فنزلت أنا وهو وأخيه، بينما أختى فضلت بره مع الأولاد.

كنا في المية على عمق بسيط (لحد البطن)، وفجأة جت موجة سحبتنا لجوه، وبقينا بنغرق ومش قادرين ناخد نفسنا، وأنا كنت ماسك في أخو مراتي ومش عايز أسيبه.

أنا أساسًا معرفش أعوم كويس، وشربنا مية كتير، وبعد شوية نزل منقذ بعوامة وشدنا وطلعنا بره.

س: إمتى وأين حصلت الواقعة؟

ج: يوم 11/8/2025، حوالي الساعة 9 صباحًا، في شاطئ ريديمبكس.

س: سبب ذهابك؟

ج: هم اللي كلموني عشان أخرج معاهم بسبب حالتي النفسية.

س: طبيعة علاقتك بالمتوفين؟

ج: كانت كويسة، والتواصل بينا كان غالبًا بالتليفون، وكنت بروح لهم أحيانًا.

س: هل كان مريض؟

ج: لا أعرف إذا كان مريض نفسي أو بياخد علاج.

س: هل كانوا مكفوفين؟

ج: لا، نظرهم ضعيف لكن بيتحركوا عادي.

س: ماذا حدث لحظة الغرق؟

ج: كنا واقفين في المية، فجأة موجة قوية سحبتنا، وبعدنا عن الشط حوالي 150 متر، وكنا بنغرق ومش قادرين نستغيث، وكنا متمسكين ببعض.

س: هل تجيد السباحة؟

ج: بعرف بسيط جدًا، مش كويس.

س: وهل المتوفين يجيدون؟

ج: معرفش.

س: هل كان هناك أشخاص آخرون؟

ج: لا، المكان ماكنش زحمة، وكان فيه ناس قليلة جدًا.

س: كيف تم إنقاذكم؟

ج: منقذ نزل بعوامة، وأنا اتعلقت فيها، وطلعنا.

س: ماذا حدث بعد الإنقاذ؟

ج: هو كان توفى، وأنا كنت تعبان جدًا، وبعدها أخوه طلع وكان فيه نفس، لكنه توفى بعد الإنعاش.

س: ماذا حدث بعد ذلك؟

ج: اتصلنا بالشرطة، وجت الإسعاف، واتنقلوا للمستشفى، وبعدها خلصنا إجراءات الدفن.

س: هل هناك شبهة جنائية؟

ج: لا، الكلام ده غير صحيح، والاتهامات جاية من وائل بسبب خلافات على الميراث، وعايز يضايق أختي.

س: هل لديك أقوال أخرى؟

ج: لا.

اقرأ أيضًا: 

“ولادي قالولي بابا بيغرق”.. زوجة تروي اللحظات الأخيرة قبل غرق شقيقين بالإسكندرية