لقاء الخميسي: حسيت بخيانة زوجي في فترة بس هو أنضف من أنه يتقفش

أكدت الفنانة لقاء الخميسي أنها شعرت ذات مرة بخيانة زوجها حارس مرمى نادي الزمالك السابق محمد عبد المنصف لكنها قررت الحفاظ على بيتها وعلاقتهما سويًا، موجهة رسالة للسيدات مفادها “الست الناصحة اللي متخربش على نفسها”. 

 لقاء الخميسي عن زوجها 

وقالت الخميسي، خلال استضافتها ببرنامج "أسرار" مع الإعلامية أميرة بدر المذاع على قناة النهار إن شرارة الحب بينها وبين زوجها محمد عبد المنصف، لم تنطفئ. 

وتابعت “طبعًا بحب جوزي لغاية دلوقتي لأن هو راجل يتحب، مفيش حد معندوش عيوب ومكنش بيقعد معايا كتير ولكن هو حنين وبيحب ولاده وأمي وإخواتي وكل الناس، وقبل كده أخويا حصل له أزمة ووقف معاه، وأنا عديت بمرحلة سخيفة في حياتي في نص الثلاثينيات واستحملني، وكنت أوقات بروح الشغل وأرجع أقول أنا مش عايزة أشتغل تاني وكان بيستحملني”.

ووجهت لقاء الخميسي، نصيحة للنساء بعدم التفتيش وراء أزواجهن، قائلة: وهو في عمر الـ37 كنت ببلع حاجات كتير، زي أنه سافر شهر ومعرفش عنه حاجة، وأكلمه يقولي سيبيني، وجوزي أنضف من أنه يتقفش، وأنا حسيت أن فيه حاجة حصلت وأنا مش هفتش وراه وأضايق نفسي ليه؟ ما كل حاجة هتعدي، ولكن أنا حسيت ومش عايزة أشوف إثبات، وعملت مش واخدة بالي وعديتها".

وعن علاقتها بجمهور النادي الأهلي، قالت “جوزي بيشجع الزمالك فأنا بشجع الزمالك، ولو الأهلي بيلعب مع أي حد أو برا هشجعه لأنه بيمثل مصر”.

وعن أزمتها مع جمهور نادي الزملك، علقت قائلة “جت فترة جمهور الزمالك كان بيشتم وأنا كنت برد، مقدرش أني مردش أسكت لو حد جه ناحية جوزي أو أبويا، وأنا اللي بحسه بقوله على طول ومبستناش، وجوزي كان هيتجنن مني هو مكنش عايز يرد”.

وكشفت لقاء الخميسي، كواليس فترة تدريب زوجها في نادي الزمالك، قائلة: هو عارف أنه داخل في مرحلة صعبة وممكن في أي وقت ميكملش لأن أي مدرب بيتغير، وهما متعودين على مدرب أجبني والأجنبي بيجيب الفريق بتاعه معاه، ده كل الموضوع".

برنامج "أسرار" تقدمه الإعلامية أميرة بدر على شاشة النهار يوميا خلال شهر رمضان، في تمام الساعة التاسعة والنصف مساءً، تستضيف من خلاله عددا من نجوم الفن والرياضة والسياسة في مصر.