“كان جاي على قعدة صلح”.. شقيق أحمد الدجوي يكشف كواليس الساعات الأخيرة ويغير مسار القضية

تواصل “تليجراف مصر” نشر نص التحقيقات في واقعة وفاة الدكتور أحمد الدجوي، حفيد الدكتورة نوال الدجوي، والتي أثارت حالة واسعة من الجدل خلال الفترة الماضية، خاصة مع تضارب الروايات بين فرضية الانتحار والاتهامات المتبادلة داخل العائلة.

تفاصيل التحقيقات 

وفي التحقيقات، كشف عمرو الدجوي، شقيق الراحل، تفاصيل الساعات الأخيرة قبل الوفاة، مؤكدًا أن شقيقه كان يستعد لحضور جلسة صلح وصفها بـ “المهمة” لحل النزاعات العائلية القائمة منذ سنوات، مشيرًا إلى أنه كان في حالة نفسية مستقرة ومتفائلًا بإمكانية إنهاء الأزمة، مشيرًا إلى أنه تفاجأ بخبر وفاة شقيقه داخل فيلته بمدينة أكتوبر.

كما وجّه شقيق الراحل اتهامات مباشرة لعدد من أفراد العائلة، معتبرًا أنهم السبب وراء ما حدث، على خلفية الخلافات المتعلقة بالميراث وإدارة الممتلكات، بحسب ما جاء بأقواله أمام جهات التحقيق.

وإلى نص التحقيقات:

س: ما صلتك وعلاقتك بالمتوفى أحمد محمد شریف محمد وجيه الدجوي؟

ج: هو أخويا شقيقي وكبير العائلة واللي ماسك مؤسسة دار التربية للخدمات التعليمية.

س: ما معلوماتك بشأن الواقعة محل التحقيق؟

ج: اللي حصل إن أحمد أخويا الله يرحمه في مشاكل بينه وبين بنات عمتي، إنجي وزوجها وماهيتاب ووالدهما، والمشاكل دي بسبب إنهم استولوا على كل مملتكات ماما نوال الدجوي اللي هي جدتي والقصة دي مصر كلها عارفها والمشاكل دي بقالها حوالى 3 سنين، وإحنا من ساعتها عمالين نروح نيابات وأقسام شرطة بسبب المشاكل دي ومكناش بنوصل لأي حل.

وتابع: من حوالي شهر ونص غالباً في يوم 2025/02/19 أخويا الله يرحمه سافر السعودية يعمل عمرة وبعد كدا رجع تاني على مصر بس أنا مش فاكر بالضبط امتى، وقعد في مصر حوالى يومين وبعد كدا خد بعضه وسافر إسبانيا علشان هو عنده بيت هناك، ولما بيحب يفصل ويشتغل في الأبحاث بتاعته كان بيروح هناك وعلشان كدا سافر ساعتها وإمبارح الموافق ٢٠٢٥/05/24 أخويا -الله يرحمه- رجع مصر ووصلت طيارته على حوالى الساعة ١٠:٢٠ مساءً وفعلاً هو رجع مصر وكلمني وهو في المطار واتفقنا إننا هنتجمع في بيت واحد صاحبه بالحي المتميز.

وفعلاً السواق بتاعه اللى اسمه سيد وصله هو ومراته لبيت صاحبنا خالد عسل على حوالى الساعة ١٢:٣٠ بليل وساعتها مراته وسيد خدوا بعضهم ومشوا روحوا وشوفت أحمد الله يرحمه هناك وفضلنا نتكلم أنا وهو وهو كان مبسوط جداً إن فيه قعدة صلح هتحصل يوم 205/05/25 على حوالى الساعة 9 مساءً مع جهات مهمة في الدولة وفضلنا نتفق إحنا هنعمل إيه في قعدة الصلح دي وهو في نفس الوقت كان متخوف أحسن الطرف الثاني اللي هما بنات عمتي مايتصالحوش معانا خصوصاً إننا عملنا قبل كدا قعدات صلح كثيرة جداً ومشاكلنا برده متحلتش بسببهم علشان هما رفضوا الصلح وساعتها قالي برده إن أحمد فهيم قعد مع إنجي من حوالى عشرة أيام وبلغها إننا عاوزين نصتلح وساعتها ردت عليه وقالت إن أنا وأحمد قتلنا أمها منى وإن الموضوع ثأر وهيخلص بالدم والقعدة انتهت على كدا وقلتله أشوفك بكرا في قعدة الصلح.

وأضاف: وهو خد بعضه على الساعة ١:١٥ صباحاً وخد السواق بتاعي -اسمه عارف محروس حسن - علشان يوصله البيت وبعد كدا السواق بتاعي رجع ليا تاني في المتميز علشان يروحني أنا واللي أعرفه إنه وصله لبيته على حوالى الساعة ١:٤٥ صباحاً وأنا متكلمتش مع أحمد -الله يرحمه- تاني لحد ما النهاردة لقيت أ/ إيهاب اللي موجود معايا دلوقتي في النيابة كلمني على حوالى الساعة ٣:١٥ مساءاً وقالي إنا لله وإنا إليه راجعون.. أحمد الله يرحمه توفي وساعتها أنا قفلت وجيت جري على فيلة أخويا -الله يرحمه- وطلعت على الأوضة بتاعته وشوفته مرمي أمام الحمام وفيه دم على إيده ودماغه عماله تنزف من فوق، وفي ساعتها لقيت المباحث والنيابة جت والدنيا انقلبت وخرجونا كلنا برا وهو دا كل اللى حصل.

وتابع: عاوز أقول إن أحمد أخويا منتحرش وإنه لو كان عاوز يموت نفسه كان عمل كدا برا مصر لكنه رجع عشان قعدة الصلح وكان مبسوط جداً وكان مستعجل على الصلح وأنا بتهم إنجي وزوجها، وماهيتاب ووالدهما، إنهم السبب في قتل أخويا أحمد -الله يرحمه- خصوصاً إنهم كانوا بيهددوا كل الشهود اللى كان بيجوا يشهدوا معانا وذكر لي قبل كدا واقعة عم إبراهيم سواق ماما نوال إنهم خطفوه بعد ما أدلى بشهادته قدام نيابة قصر النيل وهو دا كل اللى أنا عاوز أقوله وهو دا كل اللى حصل.

س : متى وأين حدث ذلك؟

ج: الكلام دا حصل النهاردة يوم 2025/05/25 حوالى الساعة 3 مساءً في بيت أخويا.

س: ما سبب ومناسبة تواجدك بالزمان والمكان سالفي الذكر؟

ج: أنا جريت على بيت أخويا لما عرفت إنه توفي.

س: من كان برفقتك آنذاك؟

ج: كان معايا إيهاب سعيد ومراته نسرين سعيد.

اقرأ أيضا:

مستحيل يكون انتحر.. زوجة “الدجوي” تتهم أقاربه بقتله أمام النيابة (خاص)

بالمستندات.. نص التحقيقات يكشف تفاصيل الساعات الأخيرة في حياة أحمد الدجوي (خاص)