"كنا سنعطي له حقنة هواء".. نص اعترافات المتهم الأول بقتل الطفل "يوسف" في الدقهلية

تعقد محكمة جنايات المنصورة، اليوم أولى جلسات محاكمة المتهمين بالتخلص من الطفل “يوسف”، ابن قرية الشوامي التابعة لمركز بلقاس، وذلك بعدما أحالتهم جهات التحقيق لمحاكمة جنائية عاجلة. 

وينشر موقع "تليجراف مصر" نص اعترافات المتهم الأول "علاء ح.م.أ"، 29 عامًا، طالب بكلية الحقوق جامعة المنصورة، مقيم بقرية الشوامي ببلقاس. 

كنا نبحث عنه

قال المتهم الأول، بقتل الطفل يوسف، في اعترافاته: "لما البلد بدأ ينتشر فيها إن فيه طفل غايب عن البيت، فضلت أدور معاهم عادي أنا و "السيد"، وثاني يوم قابلت "السيد" واحنا بندور على الطفل، وسألته عن أخبار الولد قالي تمام زي الفل، بس محتاجين فلوس علشان نصرف ونجيب أكل للولد، وأخد مني على مدار الخمسة أيام حوالي 600 جنيه، وكان "السيد" اللي بينزل يجيب الأكل لـ "يوسف" عيش وجبن وعصائر، وكانت "رنا" اللي بتبعتني بيه خلال كل الفترة دي، وكنا برضه بندور عليه مع الناس عادي خلال كل الفترة دي".

حقنة هواء 

وأضاف: "في اليوم الرابع اللي هو يوم الثلاثاء حصلت خناقة بين "السيد ورنا"، شدوا مع بعض بسبب أمور شخصية، والسيد قالها إننا اتفقنا هنخلص من "يوسف" عشان شافنا، و "رنا" موافقتش على الموضوع ده، وقالت مينفعش تعمل كده، وحصلت مشادة بينهم واتفقوا في الوقت ده على الانفصال، وفي خامس يوم كان يوم الأربعاء قابلت "السيد" وساعتها كانت "رنا" خافت، وأنا و"السيد" خفنا من "رنا" إن هي تبلغ أو تمشي الولد، وقالي إحنا هنعمل إيه قولتله إني هتصرف في مكان تاني نحط فيه "يوسف"، واتواصلت مع واحد إسمه حماده عطالله، وطلبت منه يجهزلي جراج وعرفته إني خاطف طفل، وهو لما عرف الكلام ده، رفض يساعدني وبعد كده قولت للسيد، إن مفيش مكان ولازم نخلص منه، وجبت له سرنجة وقولتله هنخلص منه إننا نديله حقنة هواء، قالي لا علشان هتبان إنه مقتول، واقترحت عليه إن نديله حبة غلة ورفض برضه، علشان مايبنش أي أثر وهو بيموت خصوصا إن أهل البلد عارفين، إنه متغيب من خمس أيام".

ألقوه في المياه

وأوضح: "جالنا فكرة إننا نرميه في المياه لحد ما يغرق وخلاص لإن دي الحاجة الوحيدة اللي هنقدر نعملها وننفذها، خاصة إنه شاف وشنا وخوفنا نمشيه يقول لقرايبه علينا، وقولنا هنصوره قبلها ونساوم أهله على الفلوس، ويومها بالليل يوم الخميس 2023/11/1 حوالي الساعة 12 مساء، اتفقت أنا و"السيد" إني أجيب عربية "أشرف" أخوه، ودخلتها الجراج ونزلنا "يوسف" حطيناه في شنطة العربية، بعد ما اديناله حباية مهدئة كانت مخلياه مدروخ ومهدياه خالص، وكان شبه نايم وبعد كده حطيناه في شنطة العربية، و"السيد" جاب قالب حجر كبير من قدام بيته وجاب حبل وكنا عاوزين نرميه في أي بحر بعيد وساعتها انا قعدت أوجهه على طريق معين ناحية الحفير، تبع الستاموني وفضلنا ماشيين على طريق ترابي حوالي ساعة ونصف، لحد ما وصلنا على طريق بحر يسري، ونزلنا "يوسف" من الشنطة، وهو كان صاحي وأنا و"السيد" ربطناه بالحبال وربطنا الحجر اللي "السيد" كان جايبه من قدام بيته حوالين بطنه وساعتها كان مستغرب من اللي إحنا بنعمله، وكان عمال بيقول "فيه إيه وانتوا بتعملوا كده ليه؟"، وأنا شيلته ورميته في المياه وفي نفس الوقت الحجر وقع معاه ونزل مطلعش وجرينا بالعربية على البلد".