مش هنقبل الدية لو بكنوز الدنيا.. شقيق بائعة الشاي: لقيت أختي متقطعة وكل عضو في حتة

بكلمات يملؤها القهر والوجع، روى إسلام، شقيق هدير "بائعة الشاي"، ضحية حادث الدهس المروع، تفاصيل اللحظات الأولى لتلقيه خبر وفاة شقيقته إثر دهسها بسيارة يقودها طالب وبرفقته فتاة بمنطقة حدائق الأهرام، مؤكدًا تمسكه بالقصاص ورفضه أي محاولات للتصالح أو قبول دية.

“رنت عليا قبلها بربع ساعة.. نزلت لقيتها ميتة ومتقطعة”

وقال إسلام في تصريح خاص لـ"تليجراف مصر": " أنا نزلت لقيتها ميتة في الشارع، وأخدناها دفناها والحمد لله لحد دلوقتي مش مصدق إن أختي أصلاً اتوفت".

وكشف الأخ عن لحظة معرفته بالحادث قال: "أخت رنت علي قبل الحادث بربع ساعة، برن عليها تاني لقيت واحدة بترد عليا حضرتك مين؟ قلتلها أنا أخوها، قالتلي تعالى دي مخبوطة.. نزلت لقيتها ميتة ومتقطعة وربنا رحمها وخد روحها في ساعتها.. كانت هتموت بالبطيء"

وعن هول المشهد الذي رآه، يضيف شقيق الضحية: "ربنا رحمها إنه خد روحها في ساعتها، أختي لو كانت فضلت عايشة على اللي هي فيه ده كانت هتفضل بتموت بالبطيء، فربنا عشان بيحبها في ساعتها قبض روحها".

وتابع واصفًا ما شاهده: "قلت يمكن مخبوطة خبطة بسيطة آخدها أوديها مستشفى، رحت لقيتها ميتة، البت عربيتها واقعة جنبها، ورجلها التانية واقعة جنبها، وبطنها متفتكة... عاوز أقولك عصروا البت، كانوا ماشيين بسرعة جنونية.

بتاكل عيش بالحلال

واستكمل أختي كانت طالعة على أكل عيشها، بتاكل عيش بالحلال، ولا كانت طالعة لايف تيك توك ولا حاجة".

وكشف أن شقيقته كانت تعمل مدرسة في مدرسة لغات على طريق إسكندرية الصحراوي، ثم في شركة عقارات بحدائق الأهرام.

وأضاف الأخ “هي ما بتحبش تقعد في البيت، بتقعد فترة وتنزل شوية”.."مش هنقبل الدية ولو بكنوز العالم.. عاوز حق أختي"؟

وحول ما تردد عن محاولات للتصالح، نفى إسلام حدوث أي تواصل، وقال بحسم: "مافيش حاجة حصلت بس أنا ولا عايز حد يكلمني خالص، إحنا مش هنقبل بأي تعويض ولا أي حاجة، ولا كنوز العالم كله ييجي حاجة في ضفر أختي".

وأضاف: "في ناس بتقول إن هم ذكروا دية، إحنا بقى مش هنقبل لو العالم كله جه تحت رجلينا إحنا مش عاوزينه.. أنا عاوز أختي، هتدوني أختي ماشي، مش هترجعوا لي أختي يبقى أنا عاوز حقها من الناس اللي موتوها"."

غطوها بغطاء عربية

واختتم إسلام حديثه بوصف المأساة: "أختي كانت طالعة تأكل عيش، أختي كانت غلبانة، ما كانتش بتعمل حاجة غلط.. واحدة واقفة على أكل عيشها حياتها تنتهي في نفس الوقت كدة وموتة بشعة".

وتابع: "موتة بشعة أنا لحد النهاردة مش عارف منظر أختي كان عامل إزاي، والله العظيم ما عارف.. أنا عاوز أقولك أنا أختي كانوا مغطيينها بغطاء عربية".

اقرأ أيضًا:

دماء على عربة قهوة.. حكاية "بنت الأكابر والشقيانة" في حدائق الأهرام

ضبط المتهمة بدهس فتاة تعمل على عربة قهوة بحدائق الأهرام