"حق ابني مش فلوس".. والد الطبيب البيطري ضحية الصعق بالصف يكشف مفاجآت صادمة (خاص)

كشف سيد فايد، والد الشاب محمد سيد فايد المتوفى إثر صعق كهربائي بسور أحد الأندية الرياضية (غير مرخص) في مدينة الصف بالجيزة، تفاصيل جديدة عن الواقعة، مؤكدًا أن إدارة النادي تجاهلت تحذيرات سابقة بوجود ماس كهربائي منذ أكثر من شهرين.

سور النادي السبب

وقال والد الضحية في تصريحات خاصة لـ"تليجراف مصر": "بعد الوفاة عرفت إن محمد كان بيلعب في النادي وحصل له ماس كهربائي واتكهرب، وعرفت بعدها إن دي مش أول حادثة.. الشباب اللي اتكهرب قبل كده أبلغ إدارة النادي والملاك بأن فيه ماس كهربائي من شهرين، مش وليدة اللحظة".

وأضاف: "النادي اتضح إنه غير تابع لوزارة الشباب والرياضة، وغير مرخص ومفيهوش وسائل أمان تحمي الأطفال، والنادي جنب المدارس والمجمع والمعهد الأزهري، وكل طلبة الابتدائي والإعدادي بيروحوا النادي ده".

الإدارة تجاهلت البلاغات

وأكد والد الضحية أن الحادثة تكررت قبل ذلك: "حدثت كذا حادثة قبل كده وحصل تبليغ لإدارة النادي وأصحاب النادي القائمين عليه وتجاهلوا الموضوع، قالوا ده ماس بسيط مش هيعمل حاجة، لكن السور الحديدي والكهرباء بتسمع لكل اللي حول النادي".

وتابع: "وإحنا في الميتم وفي البيت برضو شباب جت وأطفال صغيرة 13 سنة و15 سنة وأبلغوا إن الماس ده موجود بقاله فترة وبلغوا إدارة النادي ومحدش خد أي قرار".

طب بيطري

وعن نجله الراحل، قال الأب: "محمد كان في طب بيطري وهو أساساً كان عاوز طب بشري ومحصلش نصيب، فاتجه لاتجاه تاني خالص، حول تجارة واجتهد على نفسه، خد كورسات إنجليزي وألماني وفرنساوي".

وأوضح: "اشتغل في كذا شركة في المعادي وخد خبرة، وفي الآخر آخر شهرين بالضبط اتنقل لشركة خليجية كان بيشتغل فيها من البيت.، وامتحنوا معاه حوالي 100 شاب هو الوحيد اللي نجح، لأنه كان خد خبرة ثلاث سنين وكان متمكن في اللغة".

"رفعت قضية.. وحق محمد مش فلوس"

وقال سيد فايد: "أنا رفعت قضية بطالب فيها بمحاسبة كل مهمل، بطالب إدارة النادي وأصحاب النادي والقائمين على النادي إنهم يتحاسبوا وحق محمد يرجع".

وشدد: "مش حق مادي، أنا حق محمد مش فلوس، لو إدوني فلوس الدنيا كلها مش هتعوض ضفره، أنا بطالب بحق محمد حق بالقانون".

اقرأ أيضًا:

دماء على عربة قهوة.. حكاية "بنت الأكابر والشقيانة" في حدائق الأهرام

ضبط المتهمة بدهس فتاة تعمل على عربة قهوة بحدائق الأهرام