بعد تنفيذ حكم الإعدام عليها.. ماذا قالت نورهان خليل في تحقيقات مقـتل والدتها ببورسعيد؟

نفذت مصلحة السجون، اليوم الإثنين، حكم الإعدام بحق المتهمة نورهان خليل، في القضية المعروفة إعلاميًا بـ"قاتلة والدتها في بورسعيد"، وذلك بعد استنفاد جميع درجات التقاضي وتأييد الحكم الصادر بحقها.

تنفيذ حكم إعدام نورهان خليل فتاة بورسعيد 

وكانت محكمة النقض قد قضت في وقت سابق برفض الطعن المقدم من نورهان خليل على حكم الإعدام الصادر بحقها، بعد إدانتها بقتل والدتها، داليا الحوشي، داخل منزل الأسرة بمنطقة مساكن الفيروز بمدينة بورفؤاد في محافظة بورسعيد، لتصبح العقوبة نهائية وباتة.

ماذا قالت نورهان خليل فتاة بورسعيد في التحقيقات؟

وفي السطور التالية تستعرض "تليجراف مصر" اعترفات نورهان خليل فتاة بورسعيد بجهات التحقيق حيث قالت: “اللي حصل إننا نقلنا من منطقة السلام ببورسعيد وروحنا عشنا في منطقة حي الفيروز من ييجي سنة تقريبًا ولما وصلنا المنطقة كنا جداد فيها وكان ساكن قبلنا فيها اللي اسمه حسين محمد فهمي محمد، هو وأسرته وكانوا ساكين في العمارة اللي في ظهرنا ورقمها 138 في الدور الثاني”.

وأضافت: "وبعدها هو اتعرف على إخواتي الاثنين أحمد وآدم وكانوا علطول مع بعض وكان كل ما يشوفني يحب يتكلم معايا بأي طريقة حتى إحنا كنا بنتشاكل مع بعض علطول وأقوله إحنا زي الإخوات وإنت زي أخويا أحمد الصغير ومينفعش تكلمني ولا يبقى بينا أي حاجة".

وتابعت نورهان خليل بأقوالها في جهات التحقيق: "وفضلت العلاقة على كده لغاية شهر سبعة اللي فات 2022 ومكنش معاه ساعتها رقم تليفوني بس أنا أول ما بدأت الدراسة بدأ يحاول يكلمني علشان أنا بدي درس لأخته الصغيرة اللي اسمها ابتسام في البيت عندنا وبعد كده بدأ يوقفني في الشارع في الرايحة والجاية ويقولي هاتي رقمك بدل ما أفضل ماشي واركي".

اعترفات نورهان خليل المتهمة بإنهاء حياة والدتها في بورسعيد

وأكملت: “قالي أنا بحبك ومش هسيبك وهفضل وراكي علطول ولو مجبتيش رقمك هقول لأخوكي وهعمل مشاكل ما بينا، وأنا إديته الرقم علشان مش عاوزة أي حوارات تحصل وعلشان برده هو علطول مع أخويا وكل ما يشوفني يفضل ماشي ورايه وعطيته رقمي بعد ما وقفنا مع بعض شوية وبعد ما اديتله رقمي روحت ولقيت بليل رسالة بس أنا مشوفتهاش إلا تاني يوم وبعد كده قلت مين فرد وقالي أنا حسين وبدأنا نكلم عادي وعرفته إني هتخطب لواحد اسمه محمد وده كان جاي عن طريق أبويا”.

وأردفت: "قالي لا أنا مش هسيبك أنا بحبك وأنا اللى عاوزك، أنا اللي هاتجوزك، فرديت عليه وقولتله إنت زي أخويا وإحنا أصحاب وأنا مش هاخون أخويا وأخلي شكله وحش خالص وبعدنا عن بعض ساعتها".

وواصلت: "بعدها بدأت العلاقة بتاعتنا تطور شوية بشوية عن طريق التليفون ونقول لبعض كلام حب ونتقابل في أماكن عامة لغاية ما اتفقنا إن إحنا في يوم نتقابل في الشقة وكان اتفقنا إنه هيطلع يسلم عليّ في الشقة وينزل وبس، ولما طلع كانت الساعة سبعة بليل وكانت مامتي في الشغل وأخويا الصغير في الشارع والكبير كان عند بابا وكنت قايلاله إن هما مش موجودين في الشقة وطلع وساعتها دخل جوة الشقة عندنا وقعدنا على الكنبة في الصالون وقمت وعملت له قهوة وعملت لنفسي قهوة معاه وكان عندي لاب توب كان في الأوضة جوة بتاعة ماما وقعد يحاول يفتحه".

وأضافت نورهان باعترافاتها أمام رجال جهات التحقيق: "قعدنا نتكلم في التليفون ومبيطلعليش الشقة وبعد كده اتقابلنا بعدها بحوالي شهر كان في شهر 11 لسنة 2022 كلمني في التليفون وقالي أنا طالع البيت أهو وطلع دخل وقعدنا برده ومارسنا العلاقة تاني ودي المرة التانية وبعدها فضلنا نتكلم في التليفون بس ونحب في بعض لغاية ما في يوم كنت قاعدة في البيت ولقيته ساعة صلاة الفجر حوالي الساعة 5:15 صباحًا يوم 11 ديسمبر 2022 رن عليا وقالي أنا طالع أقعد معاكي شوية وأنزل قولتله مفيش وقت ماما هتصحي شوية وهتنزل فقالي أنا هقعد ربع ساعة وهنزل فقولتله أنا منمتش بقالي يومين وهنام فقالي أنا هطلع وهنبقى نتكلم وفعلاً طلع ودخلنا جوه الأوضة ومامتي كانت نايمة وأخويا آدم كان نايم وقعد معايا ومسك التليفون بتاعي وأنا نمت وقبل ما أنام قولتله صحيني قبل ما تنزل علشان أقفل الباب وراك فقالي لا أنا هنزل والصبح ابقي كلميني ونمت".

واكملت: "معرفش هو نام إزاي بس أنا قمت على صوت مامتي بتصحيني وهو نايم جنبي وسألتني مين اللي جنبك ده وكان أبويا موجود في الشقة فصحت أبويا وقالتله في حد نايم جنب نورهان وهي متعرفهوش وهو كان لسة نايم وبعد كده بابا دخل وقالها ده حسين جارنا وطلعنا كلنا وسبناه جوه لغاية ما نشوف هنعمل إيه معاه وبعد كده آدم وأنا دخلنا صحيناه وطلع دخل الحمام غسل وشه وقعد جنب بابا وبابا سأله وقاله إنت هنا إزاي فقاله أنا كنت بصلي الفجر والحكومة جريت ورايا فطلعت على الشقة دي وفتحت بالبطاقة ودخلت وقلت هقعد شوية لغاية ما الجو يهدأ ودخلت لجوه وفكرت نورهان إنها أحمد ونمت جنبها بس مكنتش عارف إنها نورهان وبعد كده ماما قعدت تزعق وبابا قاله خلاص انزل وامشي من هنا وبعد كده ماما شكت فيه وأنا يومها نزلت روحت الكلية".

وأنهت حديثها: "ولما رجعت ماما شكت فيه وقالتلي جيبي التليفون بتاعك وفتحته ودورت فيه ملقتش حاجة علشان أنا كنت بمسح كل حاجة أول بأول وبعد كده سألت آدم هو أنت فتحت الباب لحسين فقالها لا فقالتلي يبقى مفيش إلا إنتي علشان الترباس بتاع الباب كان مقفول فمينفعش يفتحه ببطاقة وساعتها قولتلها أيوه أنا اللي فتحتله علشان هو رن علي وقالي إن الحكومة بتجري وراه وبعد كده فتحتله بس معرفش هو دخل جوة الأوضة إمتى ويومها أخدت الموبايل مني وساعتها أنا كتبت ورقة واديتها لنجاة بنت عمته علشان توديهاله ورمتها من البلكونة وقولتلها إديها لحسين ضروري وبعدها نزلت يوم الإثنين روحت المحاضرة ورجعت وبعدها روحت عديت على حسين في البيت وأهله موجودين عادي واتكلمت معاه وقولتله ماما أخدت التليفون وأنا وقت ما أعرف أكلمك هبقى أكلمك".