بسمة بوسيل: طلاقي وتامر حسني "قربني من ربنا"

قالت المطربة بسمة بوسيل، إن طلاقها من الفنان تامر حسني، ووفاة والدها، خلال فترة قصيرة، كان له أثر كبير فيحالتها النفسية، وجعلها أقرب إلى الله. 

الانفصال كان صعب

وقالت بسمة، خلال لقائها ببرنامج “ع المسرح”: “الانفصال بالنسبالي كان صعب، أنا وتامر بنحب بعض كأشخاص غير كزوجين، وهو غالي أوي عليا، ولغاية دلوقتي بنطمن على بعض في كل حاجة، وكانت خضة بالنسبالي، معلمينا كده في المغرب للأسف إن الطلاق ده مصيبة”.

كنت بجري كل شوية على الكعبة

تابعت: “في الأول كنت بقعد اشتكي إنه إزاي يحصل فيا كده، ومكنتش متوقعة إني أطلق، حصلي حاجات ورا بعض، خليتني كل شوية أقرب من ربنا، بجري كل شوية على الكعبة، وعملت عمره 3 مرات في سنة، وجمعت الصورة حسيت إن المشكلة فيا أنا بسبب إني بتعلق في الناس والمفروض إني اتعلق بربنا”.

كان روحي في أبويا

اختتمت: “أنا كان روحي في أبويا، والمفروض أكون مطمنة إن هو هيروح لربنا، وبصيت للموت بشكل تاني بعد الوفاة، ودلوقتي معنديش مشكلة مع حد بسبب إني اتصالحت مع نفسي، وبقى يجيلي حاجات كتير  في شغلي، والحاجة اللي بشوفها سحر في الدنيا هو الدعاء”. 

تامر حسني يشيد بغناء بسمة بوسيل

كان أشاد الفنان تامر حسني بأغنية طليقته بسمة بوسيل في مسلسل “نعمة الأفوكاتو” بطولة الفنانة مي عمر، من خلال حسابه الرسمي بموقع الصور والفيديوهات إنستجرام، وكتب: “امبارح مكانتش عزومة سحور عادية، كان فيها ناس كتير أنا بحبها كلهم أصحاب متقابلوش من كتير، وفيها احتفال بأغنية بسومة القمر صاحبة الصوت القمر اللي هي تتر نهاية مسلسل نعمة الأڤوكاتو، واحتفال بالنجاح الكبير أوي لمي عمر وحبيبي وأخويا اللي مشرفني المخرج المبدع محمد سامي”.