"ملتحٍ لمسني من أماكن حساسة".. نص أقوال طبيبة الأسنان في تحقيقات مشاجرة شبرا الخيمة (خاص)

شهد مركز الكابلات الطبي بمنطقة شبرا الخيمة واقعة أثارت جدلًا واسعًا، بعدما تحولت مشادة داخل عيادة الأسنان بين طبيبة وإحدى المريضات إلى مشاجرة امتدت إلى مكتب مديرة المركز، وسط تبادل للاتهامات بين الطرفين بالاعتداء والسب وإحداث الإصابات، لتباشر جهات التحقيق تحقيقاتها لكشف ملابسات الواقعة والاستماع إلى جميع أطرافها.

نص اقوال الطبيبة سارة

وحصلت "تليجراف مصر"، على نص التحقيقات في القضية، والتي تضمنت أقوال طبيبة الأسنان سارة، حيث روت تفاصيل الواقعة منذ دخول المريضة إلى عيادة الأسنان، وصولًا إلى المشاجرة داخل مكتب المديرة، مؤكدة أن شخصًا ملتحيًا اعتدى عليها وأمسكها من منطقة حساسة، بينما أمسك بها شابان من أماكن حساسة بجسدها، بحسب ما جاء في أقوالها أمام جهات التحقيق.

طبيبة الأسنان تعترف بتفاصيل الواقعة

وقالت طبيبة الأسنان في أقوالها أمام جهات التحقيق: “اللي حصل إن أنا امبارح روحت المركز، مكان شغلي، زي أي يوم طبيعي، وكنت موجودة في عيادة الأسنان بالمركز، وساعتها دخلت بنتين منتقبتين العيادة، واحدة منهم عايزة تخلع ضرس، وتقديرًا لنقابها أنا بادرت باستقبال الحالة، عشان اللي كان موجود ومتاح للكشف عليها وقتها كان دكتورين رجالة”.

صندوق المخلفات السبب

وأضافت: “وفعلًا خلعت لها الضرسين، الضرس الأول وريتهولها وحطيته على الاستاند جنبي، والضرس الثاني خلصته ووريتهولها برضه، وبعدها رميت الضرسين في صندوق المخلفات الطبية الآمنة، وده الإجراء السليم لمنع انتشار العدوى.”

وتابعت: “المريضة وأختها اتعصبوا جدًا، وكانوا عايزين الضرسين، وأنا حاولت أفهمهم إن مينفعش ياخدوا الضرسين، لكنهم كانوا متعصبين أوي إني رميتهم من غير ما أستأذنهم، وساعتها معرفتش أتناقش معاهم، ووجهتهم للدكتور عبد الله عشان يحاول يقنعهم، وخرجوا له، لكنه برضه حاول يفهمهم، لكنهم مقتنعوش”.

واستكملت: “بعدها دخلوا العيادة تاني، وابتدى النقاش يحد من طرفهم، وشتموني، فقولتلهم اطلعوا بره، لكنهم فضلوا يشتموني، هي وأختها، ويتنمروا عليا”.

تمنر على الطبيبة

وأضافت: “أنا خرجت وسيبتهم، وقعدت في مكتب استقبال عيادة الأسنان جنب زمايلي، وهم خرجوا ورايا وفضلوا يشتموني ويكملوا التنمر، وأنا قولتلهم اطلعوا بره، وساعتها واحدة فيهم طلعت الموبايل وبدأت تصورني وتهددني، وأنا رشيت شوية مياه من الزجاجة اللي كانت معايا على الموبايل عشان متصورنيش”.

وأردفت: “هي ساعتها قربت مني أكتر، وكانت بتحط الموبايل في وشي عشان تصورني، فرحت واخدة شنطتي اللي كانت على المكتب، وحاولت أخبط الموبايل عشان يقع ومتقدرش تصورني، وفي ساعتها الاتنين مسكوني وضربوني وسحلوني على الأرض، والتمريض دخل وأخدني من وسطهم، ودخلوني مكتب المديرة وقفلوا عليا”.

وأضافت: “وهما خارجين من المركز فضلوا يزعقوا ويشتموني ويقولوا: إحنا هنجبلك رجالة، وساعتها كلمت أخويا إسلام، عشان خفت من التهديد، وكنت عايزاه يجي يروحني عشان محدش يعملي حاجة وأنا مروحة، وعشان كنت متبهدلة من ضربهم”.

الاعتداء على شقيق الطبيبه

وتابعت: “بعد حوالي 10 دقائق، إسلام أخويا جه ودخل مكتب المديرة اللي أنا فيه، وسألني أنا والمديرة على اللي حصل، وأنا لسه بحكيله، لقيت البنتين جايين، ومعاهم راجل ملتحي واتنين شباب، واقتحموا مكتب المديرة اللي أنا وأخويا قاعدين فيه، وكانوا بيشاوروا عليا”.

واستكملت: “واحدة من البنتين شاورت عليا، وواحد من الشباب اللي كان معاهم جه عليا، فأخويا قام يحوشه قبل ما يضربني”.

وأضافت: “والشاب التاني، واللي عرفت بعد كده إنه أخوهم، مسكني أنا وأخويا، وفضلوا يضربونا ضرب هستيري، وواحد فيهم كان معاه مقص وفضل يضربني بيه، وكمان فضلوا يرموا علينا كراسي وكسروا المكتب، واللي كانت لابسة نقاب أسود فتحت زجاجة مياه وفضلت تدلقها عليا وهم بيضربوني”.

شخص ملتحي تعدي على الطبيبه

واختتمت أقوالها قائلة: “كل اللي كانوا في مكتب المديرة طلعوا يجروا بره، وإسلام فضل يحاول يبعدهم، وبعدها ناس من بره دخلت عشان تخرجهم، وفعلاً كانوا بدأوا يخرجوا، لكن مرة واحدة زقوا الناس اللي كانت بتخرجهم، ولفوا راجعين يدخلوا تاني، فأخويا فضل يرمي أي حاجة قدامه عشان يبعدهم عن الباب ويحمينا منهم، وساعتها رمى مج تقريبًا، وجه في واحدة من البنتين، فقام الراجل الملتحي والاتنين الشباب كسروا باب مكتب المديرة، وأخذوا منه جزء حديد، وفضلوا يضربوني أنا وأخويا، وفي الوقت ده واحد فيهم شد طرحتي وقلعها، والاتنين الشباب والراجل الملتحي فضلوا يمسكوني من أماكن حساسة، وبعدها لقيت ناس كتير جدًا دخلت المكتب وأخدتهم وطلعتهم بره.”

إحالة طبيبة الأسنان بواقعة شبرا الخيمة و6 متهمين للجنايات

وفي السياق ذاته، قررت نيابة ثان شبرا الخيمة الكلية، إحالة طبيبة أسنان شبرا الخيمة "سارة عوض" و 6 آخرين إلى محكمة الجنايات المختصة، على خلفية مشاجرة نشبت بسبب رغبة المريضة في الحصول "الضرس المخلوع".

ووجهت النيابة العامة، للمتهمين "خديجة"، و"فاطمة" و"معتصم"، و"محمد"، و"أشرف"، تهم التعدي على موظفة عامة أثناء تأدية عملها وإتلاف ممتلكات عامة “مال عام” ـ مركز الكابلات ـ بنطاق حي شبرا الخيمة ثان.

وأسندت النيابة العامة للطبيبة "سارة عوض" تهمة التعدي بالسب والقذف على "خديجة"، بينما وجهت لشقيق الطبيبة تهمة إحداث إصابة للمجني عليها "خديجة"، وتعاطي مواد مخدرة.

القبض على المتهم الهارب

وأظهرت عينة تحاليل المخدرات للمتهم الهارب بعد القبض عليه من قبل رجال مباحث شبرا الخيمة، إيجابية تعاطيه للمواد المخدرات.

وكشفت نتائج تحليل المواد المخدرة التي خضع لها المتهمون في واقعة التعدي على طبيبة أسنان داخل مركز طبي بدائرة قسم ثان شبرا الخيمة بمحافظة القليوبية، عن إيجابية عينة شقيق الطبيبة لتعاطي المواد المخدرة، فيما جاءت نتائج باقي المتهمين سلبية بالكامل.