"لؤة خلف بتكذب وتفتري".. عضو نقابة المحامين بسوهاج: "فيه حاجات ما ينفعش تتقال"

كشف الدكتور علي الأمير، عضو مجلس نقابة المحامين بسوهاج ورئيس لجنة الحقوق والحريات بالنقابة، تفاصيل جديدة بشأن واقعة إيقاف المحامية لؤة خلف، نافيًا صحة ما تردد عبر مواقع التواصل الاجتماعي أن إيقافها بسبب عدم ارتداء الحجاب.

عضو بنقابة محامين سوهاج يكشف تفاصيل إيقاف لؤة خلف

وقال الدكتور علي الأمير، في منشور عبر حسابه على "فيسبوك" الزميلة لؤة مقيدة ما بقالهاش أكتر من 5 أو 6 شهور في النقابة، وراحت على جميع صفحات التواصل الاجتماعي تدعي وتنسب كذباً إلى نقابة محامين سوهاج إن النقابة بتجبرها على ارتداء الحجاب، وكل اللي اتقال إشاعات، وكلنا محامين وإحنا في دولة قانون، وبعدين مين اللي يقدر يعمل الكلام ده، ومين اللي في مجلس النقابة سواء سوهاج أو بره سوهاج يقدر يقول الكلام ده، وفين الكلام ده في قانون المحاماة، وبعدين هي مقيدة ومعاها كارنيه المحاماة، الكلام ده ما ينفعش يتقال".

اتهامات باطلة لنقابة المحامين بسوهاج

وأضاف: “ما ينفعش نقابة محامين سوهاج يتقال عليها الكلام ده، سواء السيد النقيب أو أعضاء مجلس النقابة، وما ينفعش الزميلة تطلع وتتهم النقابة بهذه الاتهامات، ولازم يبقى وراء هذه الاتهامات والافتراءات تحقيق، والكلام اللي منتشر على السوشيال ميديا ما ينفعش، وجميع المحامين عارفين مين هو نقيب محامين سوهاج ومين هم أعضاء مجلس نقابة محامين سوهاج، والناس لو عايزة تعرف الحقيقة تشرف إن شاء الله ونتشرف بيها داخل النقابة من الساعة 9 إلى 4 عصرًا موجودين، ويقدروا يطلعوا على صورة من التحقيقات بالواقعة”. 

وأكمل: “في أمور ما ينفعش تتقال على الملأ، في أمور نسبت للزميلة، لازم تكون هي على دراية كاملة بيها، وهي على دراية كاملة بيها، فإحنا كمحامين إن لم نحافظ على هيبة هذه المهنة، وهيبة الرسالة التي نؤديها كمحامين محدش هيحافظ عليها”.

التحقيقات توضح أسباب القرار

وقال: “نقابة المحامين سواء كانت محامين سوهاج أو نقابة المحامين العامة، هي الممثل القانوني لجميع المحامين، لما آجي في أقل من 24 ساعة ألاقي صفحات التواصل الاجتماعي من القاهرة لأسوان بتتكلم على زميلة عشان كلام مرسل، وكلام ما ينفعش يتصدق، وكلام ما ينفعش واحد عاقل يقول لحد تعالى إنت مش هينفع تشتغلي في المحاماة عشان إنتي مش محجبة، ما إحنا عندنا زميلات كُتار وعلى رأسنا جميعاً يعني مسائل ما ينفعش تاخد الحذو ده، ما ينفعش تاخد هذا المنحنى من الحديث ومن الافتراء والكذب”.

وأضاف: “كان واجب علينا كأعضاء مجلس نقابة إن إحنا نطلع ونرد، وهي بتقول المنع بسبب إن النقابة عايزة تخليها ترتدي الحجاب، إيه الدليل؟.. وفين من أعضاء النقابة ولا السيد النقيب يعتنق هذا الفكر الجاهل؟.. فغلط أن إحنا دلوقتي ناس يعني كلنا أصحاب فكر معتدل، لما تيجي القانون والشرع والدستور كفل حق العقيدة، مش بنتكلم على حجاب دلوقتي، وما بنتكلمش على حجاب، ده إحنا بنتكلم على عقيدة، كل واحد حر في العقيدة بتاعته وفي دولة القانون، ومن قبل القانون الدستور ومن قبل الدستور الشرع”.

اقرأ أيضا:

هل تم إيقاف لؤة خلف محامية سوهاج بسبب الحجاب؟.. عضو بالنقابة يوضح