أسرة ضحايا حادث أتوبيس الأميرية تروي اللحظات الأخيرة لإسلام ومنار وجنينها (فيديو وصور)

في ليلة كان من المفترض أن تنتهي بفرحة وضحك ورقص، انتهت بجنازة شقيقين هما "إسلام" 23 سنة، و"منار" أخته الحامل في الشهر السابع بالإضافة لشاب ونجل شقيقه، لقوا مصرعهم في حادث مروع بأتوبيس الأميرية بطريق جسر السويس.

"كان رايح يوصل أخته لزوجها"

وقالت شقيقة الضحايا فى أول ظهور مع “تليجراف مصر”: “كنا في خطوبة ابن خالتنا في كافيه بسيط ، ومنار كانت فرحانة جداً وماسكة بوكيه الورد وبتتصور، وزوجها كان عنده مذاكرة فاتفقوا يتقابلوا عند كوبري مسطرد”.

وتابعت: “إسلام أخويا ده كان العقل كله، متجوز بقاله سنتين وعنده محمد سنة واحدة، كان شايله وبيتنطط بيه من الفرحة”.

واستكملت: "منار قالتله يا حبيبي وصلني لجوزي، فراح يوصلها بالدراجة بتاعته، وإسلام عمره ما كان متهور، دايمًا ماشي بالراحة عشان مراته وابنه بيكونوا معاه".

"اتصل بينا وهو واقع على الأرض"

وروي زوج الشقيقة لحظة تلقيه الاتصال: "كنا راجعين من الفرح ولقينا شخص معرفة سبقنا بـ10 متر، فجأة سمعنا صوت حادث ونادى على إسلام، رجع لقاه واقع على الأرض ومش قادر يتنفس".

وأضاف: "أول حاجة إسلام قالها: روح شوف أختي بسرعة، وطلع الموبايل من جيبه بإيده وهو مصاب وفتحه، وجرينا على المكان لقينا أتوبيس داس عليهم وهرب، ومنار كانت منتقبة ومش بترد، وإسلام كان بيسألني طمني عليها".

"الجنين كان فيه نبض وبعدها مات"

يكمل زوج الشقيقة: "وصلنا مستشفى الزيتون، دخلت منار الأول عشان حالتها حرجة وكنت ببلغ الدكتور إنها في الشهر السابع، وفجأة خرج قالي منار توفت بس الجنين لسة فيه نبض، قلتله انقذوه، وبعدها قالوا الجنين كمان مات".

واستكمل: "إسلام كان واقف في الطرقة قبل ما يدخل العمليات وفجأة أطرافه لونها اتغير، وأخدوه الطوارئ وبعد نص ساعة قالوا إسلام كمان اتوفى" .

"السائق كان بيبدل مع الكمساري والأتوبيس ماشي"

ووجهت الأسرة اتهاماً مباشراً لسائق الأتوبيس، وقالت الشقيقة: "إسلام اتصدم من قدام والأتوبيس كان ماشي بأقصى سرعة، ومستحيل ده يكون واحد ماشي عاقل، أكيد كان متعاطي، بدل ما يقف هرب وداس عليهم".

وأكد زوج الشقيقة: "التحقيقات بتقول إن السائق والكمساري كانوا بيبدلوا الأماكن والأتوبيس ماشي، ده مش تصرف بني آدم طبيعي، لما وصلت المكان الأتوبيس كان فاضي، يعني غالبًا خارج من الجراج، السائق هرب والكمساري هو اللي كان سايق".

"بنطالب بالقصاص.. 4 بيوت اتهدت"

وانهارت الشقيقة وهي تتحدث عن الخسائر: "منار كانت حافظة صحيح البخاري والشيخ كان بيثني على التزامها، كانت مجهزة هدوم ابنها حمزة اللي كان نفسنا نفرح بيه، وإسلام ساب محمد سنة واحدة مش عارف هيتربى ازاي من غيره،  مراته مش عارفة تعمل أي حاجة من غيره".

واختتمت باكية: "هم بالنسبة للسواق كانوا دوسة بنزين، لكنه قتل 4 عائلات، أنا بطالب بحق إخواتي الأربعة ومعاهم حمزة، واثقة في القضاء العادل ووزارة الداخلية، أخويا مات وهو بيضحك وأختي كانت جميلة جداً وهي بتتغسل، عايزين القصاص، لأن {ولكم في القصاص حياة يا أولي الألباب}".

اقرأ أيضًا

"أختي عاملة إيه؟".. تفاصيل اللحظات الأخيرة في حياة ضحيتي حادث أتوبيس الأميرية

"داس بنزين بدلاً من الفرامل".. عم ضحية حادث الأميرية يكشف تفاصيل صادمة (فيديو)