"ارحموني أنا غلطت واتحاسبت".. داليا فؤاد توجه رسالة مؤثرة بعد قضية المخدرات

كشفت صانعة المحتوي داليا فؤاد تفاصيل معاناتها في الفترة الأخيرة بالرغم من صدور الحكم ببرائتها في قضية المخدرات، مطالبةً بدعمها والدعاء عليها.

داليا فؤاد توجة رسالة عقب برائتها في قضية المخدرات

وقالت داليا فؤاد في منشور لها عبر صفحتها الشخصية على فيسبوك: “بعد ما المحكمة أصدرت حكمها ببراءتي من اتهام الاتجار بالمخدرات كنت فاكرة إن أصعب أيام حياتي انتهت وإن كلمة القضاء كفاية ترجعلي حقي وكرامتي وأبدأ صفحة جديدة في حياتي بهدوء واحترام”.

وأضافت: “لكن للأسف خلال الأيام الأخيرة فوجئت أن اسمي بيتذكر تاني على السوشيال ميديا في قضية تانية شغلت الرأي العام، وده رغم إني ماليش أي علاقة بيها نهائي ولا أعرف أي حد من الأشخاص اللي فيها ولا عمري شوفتهم في حياتي، وكل شوية بلاقي نفسي بتربط في قصص أنا مش طرف فيها.. ليه حد يقرر يربطني بحاجات أنا بعيدة عنها تمامًا؟”.

أنا خريجة بكالوريوس إعلام 

وأكملت: “وعلى فكرة أنا خريجة بكالوريوس إعلام وكنت مقيدة في نقابة الإعلاميين وتعبت واجتهدت سنين عشان أوصل للي أنا فيه، فياريت ترحموا الناس شوية لأن كلمة بتتكتب في دقيقة ممكن تفضل تجرح سنين، أنا غلطت مرة واتحاسبت بالقانون ومهربتش من مسؤوليتي لأن مفيش إنسان معصوم من الخطأ وأخدت العقوبة اللي القانون شافها مناسبة، ولكن بعد كل ده ليه فيه ناس لسه مصممة تحملني اتهامات القضاء نفسه قال إنها غير ثابتة وبرأني منها، وفي لحظة واحدة حياتي اتقلبت سمعتي تأذت وأهلي تأذوا ونفسيتي اتكسرت بشكل محدش يتخيله”.

باعت سيارتها بسبب القضية

وقالت: "أن بعت عربيتي اللي كانت أغلى حاجة أملكها عشان أقدر أوفر مصاريف المحامين وأدافع عن نفسي وفضلت متمسكة بالأمل أن الحقيقة هتظهر وإن العدالة هتاخد مجراها للنهاية، وفي كل ده في نيابة ومحكمة وتحريات والقانون بيدقق في كل كلمة وكل دليل قبل ما يقول حكمه ومفيش حد فوق القانون ولو كان فيه دليل ضدي كنت أول واحدة اتحاسب زي ما غيري اتحاسبوا لما اخطأوا، واللي كسرني مش القضية نفسها".

وأكملت: “اللي كسرني إن فيه ناس لسه بتحاكمني بعد ما القضاء قال كلمته وبتكرر كلام من غير ما تتأكد لمجرد الترند والمشاهدات، وفي وسط كل ده في شخص لابس قناع على وشه بيتكلم وكأنه مالك الحقيقة المطلقة معدوم الرحمة والضمير بيقول كلام خطير كأنه مش شايف إن ورا كل اسم انسان بيتوجع وبيتدمر، يا ريت تفهموا إن الكلمة مش محتوى وخلاص الكلمة ممكن تهدم حياة كاملة ممكن فيديو واحد يتعمل عشان حلقة يبان فيها صاحبه قوي وهو في الحقيقة بيبقى سبب في دمار حد بريء”.

داليا فؤاد تطالب بمساندتها

وأنهت حديثها: “أنا مش بطلب دفاع عني ولا شفقة، أنا بطلب حاجة واحدة بس قبل ما تصدقوا أي فيديو أو أي منشور اسألوا وتأكدوا واعرفوا الحقيقة كاملة، لأن الكلمة ممكن تدمر إنسانة وأسرة كاملة، أنا ممكن أكون النهارده اللي بتتكلم لكن بكرة ممكن تكون أختك أو بنتك أو صاحبتك أو أي حد بتحبه هو اللي بيتظلم ويتحاكم قدام الناس قبل ما الحقيقة تظهر، ادعولي ربنا يجبر بخاطري ويعوضني عن كل وجع شوفته ويبعد الظلم عن أي إنسان”.

أقرأ أيضا:

المذيعة داليا فؤاد تلمح إلى إنهاء حياتها: سامحيني يا أمي