ابعتلي فلوس أختي ماتت امبارح.. محامي يكشف كواليس محاولة "القاضي المزيف" النصب عليه

القاضي المزيف

أحمد عبد الباري

A . .A

كشف المحامي إسلام، تفاصيل محاولة المتهم مصطفى المعروف إعلاميًا بـ"القاضي المزيف" النصب عليه، وكواليس مثيرة عن ادعائه مرض شقيقته لطلب الأموال منه.

محامي يكشف كواليس طلب القاضي المزيف للأموال منه

وقال إسلام في تصريحات لـ"تليجراف مصر": "فوجئت بالمتهم بعتلي طلب صداقة على فيسبوك، وده حصل من فترة قريبة مش طويلة قوي، قبلت طلب الصداقة، فبقوله مين حضرتك؟، فقال لي: معاك المستشار مصطفى، وقال لي إنه من القاهرة، وشغال مستشار في هيئة قضايا الدولة".

وأضاف: "بعتلي الشهادات بتاعته، ودي طبعا شهادات تضح بعد كده إنها مزورة، وكأنه بيقول لي أنا قاضي اتفرج عليا وشوفني، وبعتلي برضه شوية صور وهو لابس الوشاح بتاع القضاة، وبعتلي فيديو وهو في الجلسة، لكن الموضوع مدخلش عليا يعني".

تفاصيل عمليات نصب القاضي المزيف

وتابع: “قلت له طب معلش أستأذن حضرتك، ممكن تبعتلي صورة الكارنيه، فلقيته بيزوغ في الكلام مش راضي يبعته، وقال لي عايزك تبعتلي مبلغ مزنوق فيه، واتفاجأت مرة تانية برضه رن عليا فيديو، فاتكلمت معاه، وقال لي تاني إنه مزنوق في مبلغ”.

وأكمل: “المتهم هو بيكلمني فيديو قعد يعيط وسط الكلام، وقال لي أختي متوفية من إمبارح، وأنا مزنوق في مبلغ مالي ابعتولي ضروري، وبصراحة مدخلتش عليا اللعبة ومرضيتش أبعتله، وبعديها اكتشفت إن هو مزيف بقى بشكل رسمي من السوشيال ميديا، رغم اني حسيت إنه نصاب أول ما بعتلي طلب صداقة”.

وأنهى إسلام حديثه: "وبعدين يعني هو مش معقول إن في واحد قاضي وفي مجلس الدولة، وهيبعت طلبات كدا من غير ما يعرف الشخص اللي قدامه، وكمان يطلب منه فلوس ويقوله ظروف بيته".