القاضي المزيف في التحقيقات: "أنا بتاع طوب وقاعد في شقة بـ 800 جنيه"

"انا لسه شغال في الطوب"، هكذا اعترف القاضي المزيف أمام جهات التحقيق بعد اتهامه بـانتحال صفة قاض ودخول أحد المحاكم وإيهام المواطنين بقدرته على إنهاء مصالحهم في القضية التي شغلت الرأي العام.

التحقيقات مع القاضي المزيف

وتواصل “تليجراف مصر” نشر نص أقوال القاضي المزيف أمام جهات التحقيق، وكشف خلالها تفاصيل مثيرة يوضح سبب قيامه بانتحال صفة قاض.

س: لم وقع اختيارك على الإقامة بحي عين شمس تحديدًا؟

 ج: علشان كنت بروح لواحد صاحبي في كلية هندسة المطرية وكان عايش في عين شمس، وحبيت حي عين شمس وخدت 3 شقق إيجار مع واحد صاحبي من البلد وكنت بدفع إيجار 800 جنيه.

 س: أمارست عملا آخر حينها؟

 ج: لا مشتغلتش حاجة ثاني وشغلي كان في الطوب لحد النهارده.. وأول شغل ليا من سنين إني كنت بأجر عجل واسترزق منها.

 س: وماذا عن علاقتك بجيرانك؟ 

ج: مفيش علاقة بيني وبينهم ومحدش يعرف حاجة عني ومحدش عارف أنا شغال إيه وأنا هحكى لحضرتك كل حاجة.

س: وما تفصيلات ما ترغب في قوله؟

 ج: اللي حصل إن من حوالى 5 سنين كنت عايز أثبت نفسي وأخلى الناس في البلد تشاور عليا وتحلف بيا، وقلتلهم إني حاجة جامدة وكبيرة لأنهم كانوا بيقولولى يا فاشل ومحدش كان شايفني وحاسس بيا، ومن هنا قررت وقولت إني هبقى مستشار في مجلس الدولة علشان لما شوفت على التيك توك عرفت إنها أعلى حاجة في الدولة”.

 وتابع: "كان غرضى إني أثبت نفسى في البلد عندنا، وجيبت بدلتين من سوق الجمعة وأجرت عربية بسواق وجيبت جاردات علشان أنزل بيهم البلد وأظهر قدام الناس، وفعلا روحت البلد بيهم والناس فضلت تتكلم عليا وتقول عليا كلام حلو ولما سألونى إيه كل الجاردات دى والعربية اللي معاك قولتلهم أانا خلاص هتعين في مجلس الدولة، كان غرضى إن الناس تتكلم عليا بطريقة حلوة، ووصلت لغرضي الحمد لله وجيبت الفلوس دي من واحد صاحبي كنت بعتله اللاب توب بتاعه ورجعتله الفلوس، وعملت كروت فيها اسمى ورقم تليفوني وإني قاضى في مجلس الدولة لكن معملتش كارنيهات، ولقيت الحكومة قبضت عليا".

اقرأ أيضًا:

بدأت بخربوش وانتهت في النيابة.. 7 مشاهد مثيرة في قضية فتاة الأوبر