بعد تألقها في "بنج كلي".. سلوى محمد علي: عملت بوتوكس للشخصية ودياب فجأني

الفنانة سلوى محمد علي

A . .A

لفتت الفنانة سلوى محمد علي، أنظار الجمهور، بعد تقديمها شخصية "لورين" في مسلسل “بنج كلي"، بطولة سلمى أبو ضيف، ودياب، الذي أحبه الجمهور وتفاعل معه، واعتبره البعض إضافة جيدة في مشوارها الفني المميز.

وتحدثت سلوى محمد علي، في حوار مع "تليجراف مصر"، عن تفاصيل الدور وكواليسه ورأيها في الانتقادات التي تعرض لها العمل بجانب ردود فعل الجمهور.

دور مميز ومتنوع

وعند سؤالها في البداية عن سبب قبولها للدور قالت: "اللي جذبني للشخصية هي فكرة التنوع، وكمان نادين خان والورقة والاسكريبت والدور كان كويس والمخرجة، ومن حيث إن الشخصية كانت دكتورة أنا لعبت الدور ده قبل كده مرتين ولكن الاختلاف إن دي كانت دكتورة تجميل فواخدة بالها من نفسها ودي كانت زيادة شوية".

وعن استعدادها للشخصية قالت سلوى محمد علي: "استعديت للشخصية من خلال بروفات مع نادين وبروفات للشخصية، حتى أن نادين طلبت إني أغير قصة ولون شعري ده طبعا مع شوية معلومات عن دكاترة تجميل واللي فادني إني بشوف كتبر فيديوهات لأطباء تجميل، ده غير روحت قبل المسلسل لـ طبيب تجميل عشان يعلمني وكمان أعمل بوتوكس خاص للشخصية".

وعن تصوير المشاهد خلال العمل قالت: "مكنش في مشاهد سهلة في أي حاجة حتي لو المشهد يبدو سهل لأنه يحتاج استعدادا وحفظا وإننا نكون مع بعض".

دياب فجأني.. وسلمى أبو ضيف متنوعة

وتحدثت سلوى محمد علي عن رأيها في الفنان دياب وسلمى أبو ضيف قائلة: “أنا مقابلتش دياب كتير في المسلسل ولكن أعرفه طبعا هو شخص لطيف جدا، وهو فجأني أول مرة يحب ويكون هادي، وإحنا اتعودنا إننا نشوفه رجل العصابات".

وتابعت: "سلمى أبو ضيف بنت لطيفة أوي وهي واحدة من البنات اللي ناجحة في الجيل ده واختيارتها متنوعة هي المرة دي مختلفة وفعلا كانت دكتورة مكنش في أي مكياج وكانت لمه شعرها".

الدراما لازم تتكلم عن الفاسد

وعن الانتقادات قالت سلوى محمد علي: "أنا مش عارفة كل ما يكون في شغل يتصدى لمهنة معينة أصحاب المهنة يقولوا دولي بيسئوا للمهنة الكلام ده حقيقي أنا مش فاهماه".

وتابعت: "وجود ممرضة أو 5 في العمل مش معناه إن دول كل الممرضين والممرضات، زي ما بنشوف رجل أعمال فاسد في رجال أعمال وطني جدا، بس في الدراما لازم نتكلم عن الفاسد مش الوطني، وهما استعجلوا أوي إنهم يتكلموا ولو أصحاب مهنة اعترضوا كده مش هيكون في لا تلفزيون ولا سينما".

وعن ردود فعل الجمهور بعد انتهاء العمل بالنجاح، قالت: "كنت متوقعة نجاح العمل لأن العمل حلو والاسكريبت والأحداث فيها تشويق مش مجرد أحداث يومية في مستشفى والحالات اللي بتيجي فيها مواضيع كتير والشخصيات مبنية كويسة، المخرجة كمان في اللوكيشن كان واضح هي عايزة إيه".