"إحنا بنموت في الحواديت".. كواليس أزمة الشناوي وشوبير في المونديال

كشف الإعلامي أحمد شوبير، كواليس ما حدث بشأن مشاركة محمد الشناوي بدلًا من مصطفى شوبير خلال مباراة منتخب مصر وإيران في كأس العالم 2026، مؤكدًا أن ما جرى لم يكن نتيجة اتفاق مسبق بين حسام حسن ومحمد الشناوي، كما تردد خلال الفترة الماضية.

وأوضح شوبير، عبر إذاعة “أون سبورت”، أن حسام حسن اعتاد إعلان تشكيل منتخب مصر داخل غرفة الملابس قبل المباريات بساعتين تقريبًا، مشيرًا إلى أنه قبل مواجهة إيران لم يكن المنتخب قد ضمن التأهل بشكل نهائي، وبالتالي لم يكن هناك أي اتفاق مسبق بشأن مشاركة حارس بعينه.

كواليس أزمة الشناوي وشوبير قبل مباراة مصر وإيران في المونديال

وقال شوبير: “إحنا بنموت في الحواديت، عندنا تصفيات أمم إفريقيا والأمور تسير بشكل جيد، لكن نفاجأ بظهور موضوع على الساحة الرياضية يُعكر الأجواء.. طالما الفتي كتير والهبد كتير، هقولك حقيقة اللي حصل في موضوع محمد الشناوي، عشان تريح نفسك وترتاح”.

وأضاف: “أولاً حتى مباراة مصر وإيران مكنتش مصر تأكدت من التأهل أو الصعود، فكان لسه فاضل مركز متحسمش إن إحنا نصعد أحسن توالت يعني عشان نبقى مطمنين قبل المباراة، وحتى والمنتخب في الفندق مكنش تم الحسم”.

وتابع: “ثانيًا، كابتن حسام حسن مش بيقول تشكيل المنتخب غير في أوضة اللبس، يعني قبل المباراة بساعتين تقريبًا، فلا النتيجة اتحددت ولا ضمنا التأهل والصعود”. 

لم يكن هناك اتفاق مسبق 

وأردف: "فالكابتن حسام حسن لم يكن هناك اتفاق مسبق خالص، إن ده هيلعب أو ده مش هيلعب مطلقًا على الإطلاق نهائي، حسام دخل غرفة الملابس وكعادته أعلن التشكيل وزي ما شوفتوها مصطفى شوبير ومحمد هاني ومروان عطية وهكذا".

تأكدنا من الصعود والكابتن محمد الشناوي أبدى حزنه 

وأوضح: "ثم حدث إن المباراة خلصت وتأكدنا من الصعود، وحصل إن الكابتن محمد الشناوي أبدى حزنه لأنه عايز يبقى في تاريخ مصر الحارس اللي لعب 2 كأس العالم، شرف ما بعده شرف وفخر ما بعده فخر يعني، فالشناوي اتكلم مع كابتن إبراهيم حسن وكان متأثر". 

واستكمل: “الكابتن إبراهيم جاب الكابتن حسام وقاله اللي حصل، حسام قال لأ خلاص، فجاب مصطفى شوبير وقاله: أنا معلش هبدأ بالشناوي، مصطفى رد وقال: ”كابتني طبعًا ويلعب، موقف جميل". 

وأضاف: "فجابوا الإداري كابتن وليد بدر، قالوله حط الشناوي أساسي، فقاله الإسكور اتبعت خلاص، وهنا هيبقى عندنا حاجة من 2 يا أما نعمل تقرير بأن الحارس ده مصاب ويستبعد أو تحطه في المدرجات وتخسر تغيير". 

واستطرد: "اللاعيبة نزلت تسخن ومش عارفة مين هيلعب، كابتن حسام قال إنه ممكن الشناوي يلعب إذا قدرنا نخلص القصة بتاعت التغيير الإداري دي، فمنجحتش، فخلاص حسام قال زي ما إحنا هنلعب بمصطفى شوبير، هنعمل إيه يعني؟". 

واختتم شوبير: "خلصت القصة عند هذا الحد، لا كان هناك اتفاق ما بين كابتن حسام وإبراهيم والشناوي ولا كان مصطفى شوبير يعرف حاجة خالص على الإطلاق، فيه احترام للمدرب، المدرب قال مصطفى يلعب قاله حاضر، قاله مش هتلعب قاله حاضر، قاله الشناوي هيلعب قاله حاضر". 

اقرأ أيضًا.. 

المونديال الأخير كان البداية.. تفاصيل أزمة حسام حسن ومحمد الشناوي