مسلم: محمد رمضان ناجح "بس عمري ما اعمل زيه"

كشف مطرب المهرجانات مسلم عن رأيه في الفنان محمد رمضان، وفي الأغاني الجديدة التي يقدمها مطربو الراب "ويجز وعفروتو".

محمد رمضان ناجح

وقال مسلم، خلال لقائه ببرنامج “أسرار” للإعلامية أميرة بدر: “رأيي في محمد رمضان إنه ناجح، واللي بيعمله حرية شخصية، لكن عمري ما أعمل كده، لإني بعمل الفلوس لنفسي، محبش حد لسه بيحاول يجتهد يشوف اللي عندي ويزعل ويضايق، لإني كنت مكانه في يوم من الأيام”.

“الفلوس بتعمل كل حاجة”

وأضاف "عندي شهوة الشغل والفلوس، وأنا مدير أعمالي، وبحب الفلوس أوي، الفلوس بتعمل كل حاجة، وقادرة تخلي الناس اللي مكانتش بتبصلك، تبصلك، وعشان أنا متربي تربية مش شبه الجيل ده أنا واللي شغالين معايا، وبالنسبة لي الفلوس مش كل حاجة، لكن دلوقتي بقيت أعتمد أن الفلوس كل حاجة".  

وتابع مسلم:"شوف كام واحد قال الفلوس مش كل حاجة لما مسك فلوس بقى إيه، ناس كتير اتغيرت، أصل من غير فلوس هنعمل إيه، لو مشتغلتش على نفسي وأتعب، وأجيب فلوس، وأتطور وأطلع وأركب أحسن عربية، وأسكن في أحسن بيت وألبس أحسن لبس، الناس أكيد مش هتعمل لك حساب.

وعن شاكوش وحمو بيكا، قال مسلم: "عمري ما أتخانقت مع بيكا وشاكوش وعمر كمال، وكانوا ناجحين مع بعض لكن دلوقتي خلاص عشان مطوروش من نفسهم، كانوا بيعملوا الموسيقى واحدة وبيغيرو الصوت بس مفيش جديد، مفيش سكة جديدة، اللي نجح ويجز وعفروتو إنهم عملوا سكة جديدة، وطوروا ولما كنت في حفلاتهم لقيت ناس سنها كبير في الحفلة".