ياسر جلال عن انتقادات مقالب رامز: "المشاهير بيروحوا برجلهم"

علّق الفنان ياسر جلال على الانتقادات التي يتعرض لها شقيقه الفنان رامز جلال، لتقديمه برامج المقالب كل عام في شهر رمضان.

وقال جلال، خلال لقائه في برنامج “الراديو بيضحك” التي تقدمة الإعلامية فاطمة مصطفى، “أنا عايز أقول لكل الناس اللي بتهاجمه هو دلوقتي الفنانين والمشاهير هما اللي بيروحوا له برجليهم، وأنا ليا ناس بتكلمني تقولي معقول رامز مجبناش السنة دي، وأنا مليش دعوة بشغله، وهو مش ظاهرة فقط، بل أصبح حقيقة رمضانية موجودة كل سنة، وكل الناس حتى لو ليها تحفظ على اللي بيقدمه بيتفرجوا عليه”.

وأضاف “أنا بشكر رامز على اللي بيقدمه وبحييه على شجاعته، وتحمله كم الحروب اللي بياخدها، أنا بقوله يا رامز  أنت راجل بجد أنك تقدر تتحمل كم الحروب دي وتفضل زي ما أنت نجم النجوم، ربنا يوفقك ويزيدك”.

وتابع “أنا أكتر واحد في الكون عارف إنك تستاهل كل خير، ورامز بيعمل خير كبير علشان كده ربنا بيسترها معاه وبيوفقه، وربنا يخليك ليا يا أخويا، وأنا مليش غيره، هو أخويا الوحيد”.

آخر أعمال ياسر جلال

يشارك الفنان ياسر جلال في موسم دراما رمضان 2024 بمسلسل “جودر”، الذي تدور أحداثه في إطار من الخيال والفانتازيا، ومن خلال حكايات شهرزاد للملك شهريار، نتابع حكاية جودر ابن عمر المصري، الذي تتعقد حياته ويصبح في صراع مع العدو (شمعون) حيث يقع على عاتقه مهمة حل لغز كبير.