شككت في وجود امرأة فلقيت قتيلا.. أقوال شاهد بمقتل طفل الخصوص

ينشر "تليجراف مصر" نص التحقيقات في قضية خطف الطفل “سيف” البالغ من العمر 10 سنوات، وشنقه بدم بارد في إحدى الشقق المستأجرة بمنطقة الخصوص التابعة لمحافظة القليوبية على يد صديق والده المقرب.

وجاءت أقوال أحد شهود العيان وهو صحاب الشقة التي حدثت بها الواقعة كالتالي:

س: ما معلوماتك بشأن الواقعة محل التحقيق؟

ج: “أنا والدي عندي في البيت وأنا اللي بقوم بكل الإجراءات عشان والدي قعيد فالفراش، وهو موكلني بكل حاجة وأنا كنت بشطب شقة في البيت بتاعه وبظبط الخطوط، وكنت محتاج نقاش وسألت الموان اللي جنب بيتي عن نقاش وهو إداني رقم واحد وقالي ده كويس".

"اتصلت بيه وهو اسمه أحمد سراج الدين، وجالي وعملي الشغل اللي في الشقة، وهو شغال في الشقة سألني إن كنت بجهز الشقة عشان أقعد فيها ولا عاير أشوفلها مستأجر، وأنا رديت قولت لا دي بتاعة والدي وبوضبها عشان أسكنها، وهو ساعتها قالي أنا هأجرها منك شهر، وقالي إن حماته جاية من البلد تحضر فرح هنا وهتقعد في الشقة دي، وأنا ساعتها رفضت وقولتله لأ إحنا مبنأجرش شهر، أقل حاجة سنة وتأمين 1000 جنيه والكلام ده كان يوم 2023-11-28.

تابع شاهد العيان في أقواله، “هو قالي الفلوس مش جاهزة معايا حاليا أصبر عليا لحد يوم 5 في الشهر الجديد وأنا هأجرها منك، أنا وافقت وفعلا يوم 5-12-2023 حوالي الساعة 5 المغرب لقيت أحمد سراج بيتصل بيا وبيقولي إنه جهز فلوس تأمين الشقة وإيجار الشهر وجاهز يكتب العقد”.

“أنا قولتله تمام صور البطاقة بتاعتك وهات عقد أنا مستنيك، وجالي وكتبنا العقد وخدت منه 1000 جنيه تأمين و500 إيجار شهر 12 وسكن الشقة، وأنا عملت نسخة من العقد وأحمد أخد النسخة بتاعته، ومن يوم ما كتب العقد مجاش الشقة خالص، لأنى وأنا طالع ونازل على طول بشوف القفل على الباب لأن الشقة في الدور الأرضي، ويوم الأحد 10-12-2023 حوالي الساعة 8 بالليل كنت نازل أودي والدي للدكتور لقيت النور منور في الشقة والقفل مش على الباب، ورجعت أنا ووالدي من عند الدكتور حوالي الساعة 11 بالليل وبرضوا كان النور منور والقفل مش على الباب، بس مشوفتش أحمد موجود في الشقة ولا لا”.

 أردف الشاهد أمام جهات التحقيق، “طلعت نمت ونزلت تاني يوم الصبح لقيت أحمد واقف قدام باب الشقة وشكله غريب، حسيت إن فيه حاجة مخبيها داخل الشقة وبصراحة خوفت إنه يكون جاب ستات أو بيعمل حاجة غلط في الشقة، خدت من إيده المفاتيح وفتحت ودخلت مالقيتش حد في الصالة ولقيت باب الأوضة مقفول، فتحت لقيت الواد سيف ابن هشام على الأرض، وطيت عشان أشوفه ماله لقيته قاطع النفس نهائي”.

س: وما الحالة التي كان عليها المجني عليه سيف حال مشاهدتك له لأول وهلة؟

ج: أنا لما جيت أشوفه لقيت الواد قاطع النفس وفي ريم أبيض كثير طالع من بؤقه، وكان في حبل أخضر ملفوف حوالين رقبته.

س: وما الذي حدث عقب ذلك؟

ج: أنا فضلت أخبط على دماغي وأقول الواد مات، وخرجت لـ أحمد سراج وقولتله أنت عملت إيه في الواد أنا لقيته ميت، وساعتها اتصلت بهشام وقولته أنا عرفت مكان ابنك ووصفتله المكان عشان ييجي.

س: هل من ثمة علاقة أو خلافات فيما بينك وبين المدعو هشام والد الطفل؟

ج: هشام يبقى صاحبي من زمان ومفيش بينا أي خلافات.

س: هل من ثمة علاقة أو خلافات فيما بينك وبين المدعو أحمد سراج الدین خیري محمد؟

ج: أعرفه من بعيد عشان كان شغال مع هشام صاحبي بس ومفيش علاقة بينا ولا خلافات.

س: ما الإصابات التي أبصرتها على المجني عليه حال تواجدك بمكان الحادث؟

ج: أنا مشوفتش حاجة، أنا لما شوفت الريم خارج من بؤقه قولت ده مات.

س: وهل أبصرت واقعة تعدي سالف الذكر على المجني عليه المتوفي إلى -رحمه الله- سيف هشام رجب أحمد؟

ج: لا.

س: وما هو قصد المتهم أحمد سراج الدين خيري محمد من ارتكاب الواقعة محل التحقيقات؟

ج: معرفش

س: ما قولك فيما شهد به كلا من هشام رجب أحمد، أحمد رجب أحمد بتحقيقات النيابة العامة "تلونا عليه مضمونها تفصيلا"؟

ج: اللي حصل وأعرفه قولت عليه.

س: هل لديك أقوال أخرى؟

ج: لا

كانت قررت محكمة جنايات شبرا الخيمة، الدائرة السابعة، تأجيل محاكمة المتهم "عامل"، لاتهامه بخطف طفل يبلغ من العمر 11 سنة، وقتله، لطلب فدية من أسرته بالخصوص، لجلسة يوم 5 مايو المقبل للمرافعة والنطق بالحكم.