“حضن بناته وهو بيموت”.. القصة الكاملة لقتل صاحب سوبر ماركت بالوراق (فيديو)

شهدت منطقة الوراق التابعة لمحافظة الجيزة، واقعة مأساوية حينما تعرض صاحب سوبر ماركت للقتل على يد عاطل بسبب معاتبته للمتهم باستمرار إلقاء  القمامة أمام المحل الخاص به، بعدة طعنات أمام بناته وزوجته.

وقالت زوجة المجني عليه لـ"تليجراف مصر": “أنا كنت في البيت وسمعت صوت صريخ وزعيق في الشارع فخرجت أبص أشوف فيه إيه لقيت أربع شباب معاهم أسلحة بيضاء واقفين حوالين جوزي وكلهم بيضربوا فيه وكان معايا أولادي البنات واقفين وشافوا والدهم وهو بيتعرض للضرب”.

وتابعت: “نزلت جري أشوف في إيه لقيت جوزي مرمي على الأرض وجسمه كله غرقان دم ولقيته بياخد الأولاد في حضنه وبيقولهم متخفوش أنا كويس وكانت الدموع في عينه”.

وأضافت “أخوه خده وجري بيه على المستشفى ولما وصل المستشفى كان مات.. جوزي اتاخد غدر على يد المتهمين عشان هو كان لوحده وهما كانوا أكتر من أربع أشخاص وكلهم بيضربوا فيه وبعدين هربوا ملحقناش نشوف حد منهم تاني”.

وأكملت “أنا بناتي كل يوم يقولولي اتصلي على بابا ياماما هو فين، أنا عايزة حق جوزي وحق بناتي اللي شافوا والدهم وهو غارق في دمه وبيموت ولحد دلوقتي مش مصدقين إن أبوهم مات ومش هيرجع تاني”.

تعود تفاصيل الواقعة عندما تلقى اللواء هاني شعراوي، مدير المباحث الجنائية إخطارا من العميد عمرو حجازي رئيس قطاع شمال الجيزة يفيد بوفاة "وليد. م"، 35 سنة، بطعنة نافذة بالبطن وتوفي في الحال.

وانتقل المقدم محمد طارق، رئيس مباحث الوراق والقوة المرافقة له إلى مكان الواقعة، وتبين نشوب مشاجرة بين المتوفي و"عصام. س"، 37 سنة، عاطل، بسبب قيام المجني عليه بمعاتبة المتهم بسبب إلقاء قمامة أمام السوبر ماركت الخاص به فحدثت مشادة كلامية بينهما قام على إثرها المتهم بإخراج سلاح أبيض سكين من طيات ملابسه وسدد له طعنة نافذة بالبطن أودت بحياته في الحال.

ألقي القبض على المتهم وبمواجهته أمام اللواء محمد الشرقاوي، مدير الإدارة العامة للمباحث، اعترف بارتكاب الواقعة وأرشد عن السلاح الأبيض المستخدم، وتحرر محضر بالواقعة وأحيل إلى النيابة العامة التي أمرت بتشريح الجثة لمعرفة سبب الوفاة والتصريح بالدفن، وحبس المتهم 4 أيام على ذمة التحقيقات.