"مخلف 3 صبيان في السر".. مأساة نجلاء مع زوجها

“اكتشفت ان جوزي متجوز من واحدة تانية، وعنده منها 3 صبيان، مراته كلمتني وقالتلي هو اتجوزك عشان يرضي أبوه”، وقفت نجلاء تبكي حظها العاثر داخل محكمة الأسرة، الذي أوقعها بزوج “خسيس”، بحسب وصفها، تركها وطفلتها الصغيرة بلا سبب ارتكبته.

أقامت “نجلاء”دعوى طلاق للضرر، داخل محكمة أسرة البساتين، طالبت فيها بتطليقها من زوجها، والتفريق بينهما بعد زواج دام 18 شهرًا. 

زواج تقليدي

قالت الزوجة إنها ارتبطت بشكل تقليدي، ولم يربطها به قصة حب قبل الزواج، وأضافت أنها ارتبطت به بسبب وصية والدها قبل موته بزواجها من أحد أقاربها.

رُزقت "نجلاء" بطفلة من زوجها، وبعد نحو عام ونصف العام، تبدلت معاملته معها، ورأت أنه غير عادل في معاملتها، فرفعت دعوى الطلاق للضرر التي قيدت برقم 1938 لسنة 2023 أسرة البساتين.

"بيخدمني وانا حامل"

“اتجوزته وهو أكبر مني بـ 11 سنة، مكنتش بحبه، لكن حبيته بعدما ربنا رزقنى بطفلتى، ومقدرش أنكر إنه كان بيخدمني وانا حامل”، تشرح الزوجة الحزينة لـ "تليجراف مصر".

انهارت “نجلاء"، عند سؤالها عن سبب لجوءها إلى المحكمة للطلاق من زوجها، فقالت “أنا اتجوزت من ابن عمي، وبعد ما خلفت بنتي، جالي تليفون من واحدة قالتلي انها مراته الأولى، قالتلي انها معاها منه 3 صبيان”.

ساب البيت ومشي

“أنا ذنبي ايه، انه اتجوزني عشان يرضي ابوه زي ما مراته الأولى قالتلي، أنا بقيت ضحية ومجني عليها، مش قادرة اعيش معاه”، تكمل نجلاء شرح مأساتها.

لفتت “نجلاء” في حديثها إلى أنّها لم  تكن تعلم أنه متزوج ولديه أطفال، في حين أن أفراد أسرته يعلمون بالأمر منذ زمن بعيد، ولم يخبروها حتى لا ترفض زواجها منه.

واختتمت “لما واجهته مبقاش ييجي البيت، ولا بيطمن على بنته، مبيصرفش عليها، عشان كده عايزة أطلّق منه”.