المتهم الرئيسي في قضية "آثار باب الشعرية": صرف صحي مش مقبرة (خاص)

دفع رجل أعمال شهير، بسبب غريب في التحقيقات لتبرئة نفسه من تهمة التنقيب عن الآثار، في منطقة باب الشعرية بالقاهرة.

وخلال التحقيقات التي حصل عليها “تليجراف مصر”، في جريمة التنقيب عن الآثار بجوار مسجد الطشطوشي بمنطقة باب الشعرية، قال رجل الأعمال المتهم الرئيسي رفقة 5 آخرين، إن الحفر الذي ضبطته القوات الأمنية لم يكن بهدف البحث عن مقبرة فرعونية. 

وجاء في نص تحقيقات الواقعة الكامل، والذي حصلت عليه “تليجراف مصر”، التالي: 
س: ما اسمك وسنك؟

: أنا اسمي “كامل ع، ك” عندي 62 سنة. 

س: ما قولك فيما هو منسوب إليك كونك متهم بالاشتراك مع 5 آخرين بإجراء أعمال حفر وتنقيب بقصد الحصول على الآثار بدون ترخيص من الجهات المختصة؟

ج: محصلش

س: ما الذي حدث إذا وما ظروف ضبطك وعرضك علينا؟

ج: اللي حصل إن البيت بتاعنا كان في مشكلة صرف صحي، والماية طفت على الوش في المخزن العمومي وكان لازم أجيب ماتور غاطس عشان أسحبها من الأرض وأضخ مادة حقن لعزل المياه من الصرف الأساسي عشان أساسات البيت ماتوقعش، والبيت كله كان غرقان بمياه الصرف.

“أحد المتهمين اشتري مني مخزن في البيت، وكلمني من حوالي شهرين وقالي إنه بيغرق فيه مياه وأنا عرضت عليه إني هتكفل معاه بتكاليف سحب المياه وعزل الصرف”.

يتابع في إجابته: “بالنسبة للعمال أنا معرفش فيهم حد، وأنا جبت عمال من برا معرفتش أساميهم غير امبارح وكان معايا عامل اسمه (صلاح. ا) ودا عامل عندي في ورشة الزجاج وملوش علاقة بالموضوع، وأنا معرفش جابوني ليه القسم، أنا روحت ورشتي وهي جنب المخزن، ولقيت أمين شرطة بينادي عليا ويقولي أقف على جنب وكان معاه ظابط، وخدوا العمال والمعدات بتاعتنا وخدونا على القسم وجابونا النهاردة على النيابة، وده كل اللي حصل”.

س: متى وأين حدث ذلك ؟

ج: الكلام ده حصل امبارح حوالي 10 مساء، 5 شارع الطشطوشي دائرة قسم باب الشعرية.

س: من كان برفقتك آنذاك ؟

ج: كان معايا العمال المعروضين برة -يقصد خارج مكتب التحقيقات- وكان معايا (أحمد. ف. ث) لأنه اشترى المخزن مني أنا وورثة.

س: ما سبب ومناسبة تواجدك بالمكان والزمان سالفي الذكر؟

ج: أنا كنت امبارح قاعد برا المحل بتاعي، وهي ورشة زجاج، وكان معايا العامل (صلاح. ا. إ).

س: ومن القائم على ضبطك تحديدا؟

ج: ضابط اسمه محمد رشدي ومعاه أمناء شرطة.

س: ما سبب قيام سالفي الذكر بضبطك؟

ج: افتكرونا بندور على آثار 

س: وهل دار ثمة حوار بينك وبين القائمين على ضبطك؟

ج: أيوة.

س: ما مضمون ذلك الحوار؟

ج: هما سألونا انتوا بتعملوا إيه واحنا قلنا إننا بنشيل المياه من المخزن، لأن الصرف ضارب في المخزن كله والبيت هيقع وخدونا على القسم بعدها. 

س: وهل من ثمة تفتيش انصرف لشخصك آنذاك؟

ج: أيوة.

س: ما الذي أسفر عنه ذلك التفتيش؟

ج: مكنش معايا حاجة غير 2 تليفون بس.

س: هل توجد ثمة علاقة أو خلافات فيما بينك وبين النقيب محمد رشدي ضابط مباحث القسم؟

ج: لا أنا معرفوش

س: ما طبيعة عملك؟

ج: أنا صاحب ورشة زجاج وأنا اللي جيبت العمال عشان أعالج مشكله تسريب المياه وألحق الصرف قبل ما البيت

يقع.

س: ما سبب قيامك بالاشتراك مع المتهمين في أعمال الحفر المبينة بمحضر الضبط بالعقار الكائن في 5 شارع الطشطوشي بدائرة القسم؟

ج: الكلام ده محصلش

س: منذ متى وأنت تقوم بتلك الأعمال؟

ج: أنا شغال من حوالي شهرين بس متقطعين وبنشتغل على فترات والمنطقة كلها عارفة حوار الحفر ومفيش أي اثار والكلام ده والمخزن مفتوح قدام الناس كلها.

س: ما مقابل تنفيذ لك لتلك الأعمال؟ 

ج: اليومية حوالي 150 جنيه بالاتفاق معاهم، وفي عمال مشيت قبل كده، وفيه عمال بتيجي على فترات على حسب

الشغل.

بداية الواقعة 

كانت ضبطت الأجهزة الأمنية بمديرية أمن القاهرة، 6 أشخاص (بينهم رجل أعمال شهير) بتهمة التنقيب عن الآثار بجوار مسجد الطشطوشي بمنطقة باب الشعرية بالقاهرة.

البداية كانت عندما ورد بلاغ من الأهالي لقسم شرطة باب الشعرية يفيد بوجود عدد من الأشخاص يقومون بالتنقيب عن الآثار بشارع الطشطوشي بمنطقة باب الشعرية بالقاهرة.

آثار شارع الطشطوشي

على الفور انتقلت الأجهزة الأمنية إلى مكان البلاغ وتبين وجود أعمال حفر داخل عقار مكون من خمس طوابق وبه جراج أرضي على مساحة 120 مترًا وتبين وجود 5 أشخاص داخل الجراج يقومون بأعمال حفر ويوجد حفرة عمقها 8 أمتار وبها سلم.

تبين وجود معدات عبارة عن موتور لرفع المياه و2 كوريك و3 موتور مياه "غاطس" متوسط الحجم و3 فأس و2 مرزبة و1 شنيور و2 خرطوم مياه و1 كور (يستخدم في خرم الحوائط والخرسانة)، جرى التحفظ على جميع المعدات.
تم ضبط جميع المتهمين، وحرر محضر بالواقعة وتولت جهات التحقيق التحقيقات.