مرتضى منصور: قالوا عني قليل الأدب.. والآن الزمالك أصبح "ملطشة" (خاص)

تحدث رئيس نادي الزمالك السابق، مرتضى منصور، عن الأزمات التي ضربت صفوف القلعة البيضاء، خلال الأيام القليلة الماضية، موجهًا رسالة إلى إدارة النادي الحالية، برئاسة حسين لبيب.

وسقط الزمالك أمام المصري البورسعيدي، بنتيجة (2-1)، ضمن منافسات بطولة الدوري المصري الممتاز، التي أقيمت على استاد “الجيش” بمنطقة برج العرب.

وقال مرتضى منصور في تصريحات لـ"تليجراف مصر": “المجلس الحالي خسر 25 بطولة، منها 2 في كرة القدم، وهناك محاولة لتضليل الجمهور”.

وتابع: “هل الحكم صاحب خروج عبد الله السعيد أفضل لاعب في الفريق، هل هو السبب في خروج زيزو ولا المدرب، المدرب هو اللي طلعهم، ودي الصفقات اللي جابها أحمد سليمان، فين الفريق، مفيش فريق، الحكم ظالم بس أنت ملعبتش".

وأضاف: "أوباما سجل هدف شرعي.. هل الحكم لغى الهدف؟ لم يلغِ الهدف لأنه شرعي، في تعليمات طالعة أن الزمالك يطلع السماء، علشان مرتضى يبقى فاشل ويقولوا إنه معملش حاجة".

وأضاف “في الكونفدرالية التي حققها الزمالك في عهدي جابوا 5000 متفرج في برج العرب، وهنا 50 ألف و60 ألف في استاد القاهرة، وأكرّر.. أنا أخذتها بـ5000 متفرج وقالوا الاتحاد الأفريقي ليه نصفهم”.

وواصل مرتضى: "الحكم دا أنا هاجمته كتير (يقصد أحمد الغندور)، وكانوا بيقولوا عليّا قليل الأدب، أنا بضحك دلوقت، لأنهم كانوا بيهتفوا ضدي (يلا غور علشان النادي يشوف النور) أديني غورت وضاعت الكرامة والهيبة والشخصية وبقينا ملطشة”.

وأتم حديثه قائلًا: "حسام انضرب من عواد لأن مفيش عدل في أوضة اللبس، وعبد الله السعيد كان هيضرب الحكم علشان نفس السبب، أنا كنت بقول لأمير اعدل، الفيلم الهبطان اللي حصل دا علشان يهربوا من ماتش الأهلي، أنا بقولهم استرجلوا علشان انتوا ضيعتوا النادي".