"تليجراف مصر" يتواصل مع الخط الساخن لـ"الخارجية": أمي مفقودة في الحج أعمل إيه؟

بصوت مهزوز وحالة عصبية مفتعلة، ودموع مصطنعة، ادّعت محررة "تليجراف مصر"، في سيناريو وهمي، فقدان أمها ضمن المفقودين في موسم الحج هذا العام، لرصد كيفية التعامل مع الشكاوى الخاصة بالمفقودين من الحجاج بالسعودية على الخطوط الساخنة المخصصة لذلك.

الإبلاغ عن المفقودين

تبدأ القصة عندما اتصلنا على الخط الساخن الذي طرحته وزارة الخارجية المصرية، للإبلاغ عن المفقودين في السعودية، 01006638814، ليجيب على التليفون رجل وضح من صوته التلقائية والبساطة، ودار الحوار التالي بينه والمحررة.

بداية القصة

المحررة: ألو.. السلام عليكم، وزارة الخارجية؟

الموظف: اتفضلي يا فندم.. أيوة

المحررة: لو سمحت أنا مش عارفة أمي فين، سافرت السعودية وبقالي 4 أيام مش عارفة أوصل لها، الحقني والنبي وقول لي اتصرف إزاي؟

الموظف: هي الست الوالدة كانت مسافرة زيارة ولا حج

المحررة: أنا مش عارفة، كل اللي أعرفه إنها سافرت عشان تزور بيت ربنا، هي بتفرق في إيه مسافرة زيارة أو حج؟
الموظف: أصل لو هي مسافرة حج فأنت هتبلغي القنصلية المصرية بالسعودية، ضمن الوفد الرسمي، وهتبلغي اسمها وهم هايردوا عليكِ

المحررة: أنا مش عارفة.. يعني أعمل إيه دلوقت؟

الموظف: اسألي حد من البيت هي مسافرة زيارة ولا حج واتصلي بيا تاني.
المحررة: حاضر هاسأل وأرجع لك
بعد مرور 5 دقائق، عاودت المحررة الاتصال بالرقم نفسه، ليردّ نفس الرجل: “اتفضلي يا فندم”.

معاودة الاتصال

المحررة: أنا عرفت ماما سافرت إزاي.. هي كانت طالعة زيارة مش طالعة حج؟
هو: اديني بياناتها.. اسمها إيه؟
المحررة: اسمها إيناس محمد عثمان "اسم وهمي"، وعندها 60 سنة

معلومات زائفة

من سياق المكالمة بدا وكأنه يدوّن بعض المعلومات، وظل يردد الاسم، وفقدت في مكة أول يوم العيد.
استوقفته وقلت: "لا ماما مكانتش في مكة، ماما كانت في المزدلفة، وكانت رايحة “منى”، وسافرت مع ناس كتير من عندنا من البلد ومحدش عارف هي فين ومبتردش على تليفونها

ليجيب: تمام.. تمام يا فندم، ممكن صورة جواز سفرها

لترد المحررة: لأ.. أنا مش معايا صورة من الجواز.. جواز ماما كان معاها.

ليؤكد هو: إحنا سجلنا الطلب وهانبعت اسم والدتك ضمن كشف المفقودين

قلق مفتعل

وبصوت قلق مفتعل، قالت المحررة: يعني هاتعملوا إيه دلوقتي، هاتردوا عليا امتى طيب أنا عاوزة اطمئن على أمي.

ليرد الموظف قائلًا: والله إحنا هانبعت للقنصلية، وهي هاتعمل بحث هناك وتشوف المستشفيات وفاقدي الأهلية وهاتبلغنا، وإحنا هانبلغ حضرتك.

المحررة: أيوة يعني تقريبا هتاخدوا وقت أد إيه؟، القنصلية بتتحرك امتى في الحالات اللي زي دي؟

الموظف: أنا معرفش يا أستاذة.. لما يبلغونا هانبلغكم.

مصير الأم المفقودة

وانتهت إلى هنا المكالمة، دون أن تعرف الأبنة مصير أمها المفقودة، ومتى ستجيب القنصلية على أسئلتها الحائرة.

أرقام رسمية

ولم تخرج أي قائمة رسمية حتى الآن من مصر أو السعودية حول من توفوا خلال أداء المناسك، في ظل تضارب كبير في الأرقام، بزعم عدم تسجيل هؤلاء الحجاج ضمن إجراءات الحجّ الرسمية.

الصحة ليس لديها أرقام

وتواصل "تليجراف مصر"، مع وزارة الصحة والسكان وقالت “ليس لدينا أرقاما محددة حتى الآن لعدد الوفيات أو المفقودين، وسيتم إصدارها فور توافرها من مصادرها الرسمية".

كما تواصل "تليجراف مصر"، مع وزارة الخارجية، وقال مصدر بها: "نتعامل مع النظاميين مثل تعاملنا مع غير النظاميين وسنصدر بيانات".

ودشنت وزارة الهجرة، غرفة طوارئ بالقنصلية المصرية في جدة، لاستقبال اتصالات المواطنين ممن انقطعت الاتصالات بينهم وبين ذويهم في مكة المكرمة أو المدينة المنورة أو المشاعر المقدسة، وقد خصصت رقم الهاتف التالي لاستقبال اتصالات المواطنين: 00966565702002