" ائتمنا على أسراره" محمد رشوان يكشف تفاصيل هامة عن أزمة أحمد رفعت

كشف محمد رشوان المحامي بالنقض، عن تفاصيل أزمة موكله الراحل أحمد رفعت، بعدما ترددت أنباء عن حدوث أزمة بينه وبين فريق طلائع الجيش، تسببت في قطع رحلته الاحترافية.

وطالب رشوان، عبر حسابه على موقع التواصل الاجتماعي "فيس بوك"من الجميع، أن يدعوا لـ أحمد رفعت في الوقت الحالي، بدل "النبش" على حد قوله عن سبب حدوث الأزمة، وتقديم بلاغات ضد من تسبب في ظلم الراحل. 

وقال: "يا جماعه الخير يا أهل المسلمين.. أحمد رفعت بين أيادي الله.. ادعوله بالرحمة والمغفرة بدل "النبش" وأيه اللي حصل وأيه اللي وصل". 

وأضاف: "وأشوف واحد كاتب هقدم بلاغ ضد هيثم عرابي وواحد كاتب مش عارف مسئولي نادي أيه وصفحات ومواقع وجرايد، اتقوا الله يا جماعة.. الراجل الله يرحمه ائتمنا على أسراره، ومستحيل كده". 

وتابع:" الموضوع حصل أيام احتراف أحمد في الإمارات وأزمة وانتهت، وأثرت عليه شويه وعملتله مشكله لما جه يحترف تاني لأنه كان لاعب كبير وعنده عروض كتير.. الدكتور وليد دعبس والكابتن هيثم عرابي هما أصلا اللي حلوا الأزمة دي.. أنا بتكلم كمحامي اللاعب عليه رحمة الله.. الله يرحمك يا أحمد ويغفرلك .ويسامحك  ويسكنك فسيح جناته". 

وبعد المنشور الأول بساعتين، كتب محمد رشوان منشورا آخر يوضح فيه موقفه من أزمة أحمد رفعت، بجانب موقف هيثم عرابي مدير التعاقدات في نادي مودرن سبورت. 

وأوضح رشوان: "عشان بس ناس كتير بتتكلم.. أنا مقلتش نسكت عن حق.. أنا قلت نحترم حرمة الموت، وقلت ردا على الشائعات، ولا طلائع الجيش له علاقة، ولا الكابتن هيثم عرابي، بالعكس تماما.. أنا برد على النقطة دى بس".

وأتم:" أنا مقلتش خالص مفيش مشكلة، أنا قلت كان فيه مشكلة كبيرة وخلصت.. أنا بس بزعل أوي من الناس اللي بتقول حقه ومش حقه وهما كانوا عارفين وحاضرين من أول المشكلة.. أنا بقيت اتخض من ردود فعل الناس".