استلف مليون جنيه.. أقوال شقيق عصام صاصا في قضية التزوير (خاص)

حصل “تليجراف مصر” على أقوال شقيق المطرب عصام صاصا، في قضية اتهامه بالتزوير في محررات رسمية بالاشتراك مع الفنان، والتي تم الحكم فيها ضدهما بالحبس سنة، و10 سنوات لباقي المتهمين.

س: ما أقوالك بشأن الاتهامات المنسوبة إليك؟ 

اللي حصل إن بعد ما عصام عمل الحادثة وكان عنده حفلة متحددة من زمان يوم ۲۰٢٤/٥/٩ هو سافر ساعتها عشان يحضر الحفلة دي وبعدها ساره خليفة كلمتني من رقم دولي من الإمارات وقالت لي في شخص هيكلمك وهتروح تقابله تاخد منه ظرف وهتخليه معاك وبعدها في رقم مصري كلمني قالى أنا محمود تبع سارة هبعتلك لوكيشن عشان تیجی تقابلنی وابعتلي صورة بطاقة عصام صاصا.

وأضاف شقيق عصام صاصا: أنا بعدها بعتله صورة البطاقة وش وظهر وروحت على اللوكيشن اللى بعتهولي بسيارة أوبر وقابلته وركب معايا في العربية وكان معاه ورق وقالى امضى هنا بالاستلام وابصم وأخدت منه الظرف مفتحتهوش ومشيت وبعدها بيوم تقريبا سارة كلمتنى تانى وقالتلى هتودى الظرف اللى معاك للمحامى م.ح فا روحت وقابلني واحد على السلم وقالى أنت أستاذ محمد فقولتله أه فا أديته الظرف ومشيت وبعدها بكام يوم عصام كلمنى وقالى هتروح تودى للمحامى الأتعاب بتاعته وقالي استلف مبلغ من نسيبه وكان المبلغ مليون جنيه وروحت مكتب المحامى عند السكرتارية قالوللي استنى هنعد الفلوس وقعدت لما عدوا الفلوس وشوفت حد هناك كنت شوفته قبل كدا مع محمود الليثى وسيد الصعيدى فعرفت أنهم جوه.

وتابع شقيق عصام صاصا: السكرتيرة عدت الفلوس وأنا مثبت ساعتها ومقابلتش حد وكنت عايز أقابل المحامى بس معرفتش بعدها عصام قالى إنه هيعملى توكيل رسمي عام ومعاذ استلمها واديهالى وروحت الشهر العقار عشان هو طلب منى ألغى التوكيل بتاع سامية المحامية فقالولي إن التوكيل دا لازم يتصدق الأول فروحت صدقته من الخارجية وروحت أودعت التوكيل اللى عملهولى عصام وبعدها روحت لغيت توكيل المحامية اللى اسمها سامية وهو دا كل اللى حصل.

س: من كان برفقتك آنذاك؟

ج : أنا كنت لوحدي مفيش حد راح معايا.

س: ما سبب ومناسبة تواجدك في الأماكن والأزمنة سالفة الذكر؟

ج: أنا روحت هناك وعملت كل دا بناء على توجيهات سارة خليفة.

س: ما هي علاقتك بالمدعوة سارة خليفة تحديداً؟

ج: أنا مفيش بينى وبينها علاقة شخصية ومقابلتهاش قبل كدة خالص بس هي شغالة مع أخويا عصام في الحفلات اللي بتجبهاله بتاعة دبي.