"عروسة فاميه".. فارس حميدة يثير الجدل بحفل خطوبته

فستان بلون البنفسج، ونقاب وتاج لامع، وقفازات من "الجوبير"، هكذا أطلت خطيبة مؤدي المهرجانات المعتزل فارس حميدة، في حفل خطوبتهما الذي أقيم بمنزل العروس قبل يومين.

روى حميدة تفاصيل حفل الخطوبة الذي أثار جدلًا واسعًا على مواقع التواصل، إذ حرص على أن يكون الحفل خاليًا من المخالفات الشرعية، واستبدل الأغاني المعهودة في الحفلات بأخرى ذات طابع ديني.

فرح إسلامي

الفنان المعتزل كتب منشورًا على صفحته الشخصية بموقع "فيسبوك"، قال فيه: "هحكيلكم حكاية جميلة جدًا.. لمّا روحت اتقدمت لخطيبتي وربنا يسر وجه وقت (هنعمل إيه فالشبكة وكدا)، كان كل همي أنا وهي منرتكبش أي مخالفة شرعية، هي من جانب لبسها وأنا من جانب الوضع اللي هيحصل، خصوصًا أن عائلتي وعائلتها يمكن أول مرة يحضروا حاجة اسمها فرح إسلامي".

مخالفات شرعية

وأضاف فارس الذي اعتزل غناء المهرجانات واتجه إلى عالم الابتهالات والأناشيد الدينية: "زي كتير من الأهالي عارفين إن الفرح يعني أغاني ورقص وهيصة، وكان همي أنا وهي ندعوا أصحابها اللي مش محجبات حجاب شرعي وأنا أجمع أصحابي، وقالت لي أتحايل على الشيخ علاء حامد علشان يقول كلمة في الفرح عسى أن واحدة من صاحباتي تقتنع بالحجاب الشرعي".

مفيش رقص

وتابع: "أنا من الناحية التانية ملجم أصحابي مفيش أغاني ومفيش رقص، هنلم الدنيا في هدوء مش هنعمل حاجة حرام واجتهدت في ذلك الحمد لله".
وأوضح حميدة في منشوره: "أنا وهي كان نفسنا نكون مثال عملي لأهلنا وأصحابنا إن الالتزام مش خنقة ولا عدم فرحة كان نفسنا نقول لأهلنا واصحابنا إن دا الصح ودا الطبيعي، مش الحرام هو الصح والطبيعي، الصورة اللي نزلتها انا بقول لكل واحد انتقد وقال مينفعش جزاك الله كل خير وانت صح، لكن قصاد المخالفة البسيطة دي ربنا أراد من صورة نوصل رسالة لكل الشباب أقل ما فيها (حلوة التفييمة دي انا هفيهم زوجتي كدا)، أقل ما فيها إن الافراح الإسلامية عسل أهي، بص قاعد بعيد عنها إزاي الله بجد، وأخيرًا جزاكم الله خيرًا جميعًا وبارك فيكم جميعًا".

تعليقات المتابعين

إحدى المتابعات تُدعى “هاجر عماد”، علّقت على منشور فارس حميدة، بقولها: “ناس متشددين ربنا يعافينا من أمثالهم والله مش بيسيبوا حد محترم في حاله”.

فيما كتب علاء حامد، تعليقًا قال فيه: “الخطوبة كانت مبهجة جدًا وكل الناس كانت مبسوطة خالص وكنت خلاص بقنع حماك نخلص في كتب كتاب على الواقف كدا”.

وعلق حساب باسم محمد أزهري، قائلًا: “ربنا يجازيك الخير ويفرحك ويتم عليك النعمة، وكتير من اللي انتقدوا أو نصحوا كان بدافع الحب، وانت ضربت المثل الأعلى في تقبل النصيحة وهذا ظننا بك”.

فيما انتقدت دينا إسماعيل المنشور، قائلة: “هو ماينفعش كل واحد يتزف من غير رغي؟ ما اللي عايز يفيّم يفيّم واللي عايز يقلع يقلع واللي عايز يرقص يرقص، ولا راحت عليك في المهرجانات قُلت تشوف سكة التفييم؟”.