"لو رديت هزعله".. عبدالواحد السيد يعلق على أزمة يوسف حسن

علق مدير الكرة بنادي الزمالك  عبدالواحد السيد، على أزمة يوسف حسن، لاعب الفريق السابق، عقب اتهام اللاعب إدارة الزمالك بإهمال علاجه.

وقال عبدالواحد السيد في تصريحات لـ"تليجراف مصر": "مش هرد على يوسف حسن لأن لو رديت هيزعل، اللي حصل دا شغل ميديا ربنا يوفقه في أي مكان تاني".

حصلي إصابة ومحدش عبرني

قال يوسف حسن لاعب الزمالك السابق في تصريحات مع إبراهيم عبدالجواد: "أنا حصلي إصابة وكنت محتاج أعمل عملية قعدت في البيت 3 شهور أكلم الناس في النادي واتصلت بكابتن هشام نصر محدش بيرد عليا".

وأضاف: "لما نزلت بوست قلت فيه الكلام ده كلموني ورحت لكابتن حسين لبيب قالي شوف هتتعالج فين وإحنا هندفع، روحت للدكتور خالد الشناوي اتعالجت معاه شهرين مدفعوش الفلوس ليه فأنا اتكسفت أروح تاني لأن الراجل كان بيطالب بفلوسه وقعدت في البيت شهرين كمان".

برنامج تأهيل في النادي

وتابع: "كلمت دكتور أحمد أسامة طبيب الزمالك قالي تعالي اعمل تأهيل في النادي روحت هناك لقيت عبدالواحد السيد بيقولي جوميز بيقولك مش عايزك تجري حوالين الملعب قلتله هو لو لاعب كبير اتصاب هتقولوله كده؟ وجوميز يعرفني منين عشان يقول كده ده لسة جاي؟".

مفيش اهتمام

وأتم حديثه: "الموضوع ده أثر في نفسيتي جدا ونزلت بوست تالت وقتها وقلت إن مفيش اهتمام فرجعوني وقتها اتعالج واتمرن هناك وفي الآخر بدون مقدمات لقتهم بعتوا قايمة الفريق وأنا مش موجود فيها بدون ما يبلغوني".