فلوسي حلال ولا حرام.. عمر كمال يطلب فتوى الأزهر: "تعبت من الانتقادات"

أعرب المطرب الشعبي عمر كمال، عن استيائه من الانتقادات المتكررة التي يتلقاها بخصوص مصدر أمواله ومدى قبول الله لأعمال الخير التي يقوم بها.

وقال كمال في فيديو نشره عبر صفحته على فيسبوك: "تعبت نفسيًا من كلام الناس، وبطلب من شيخ من الأزهر يرد عليا ويريحني، إيه معنى، الله طيب لا يقبل إلا طيب؟ أنا بعمل الخير من غير ما أظهره للناس، ومع ذلك تعبت من الانتقادات اللي بتلاحقني".

بعمل اللي أقدر عليه

وأضاف: "بساعد اللي عايز مساعدة، واللي سقف بيته واقع بصلحهوله، واللي عايز يتجوز بساعده، دايمًا بعمل اللي أقدر عليه، أنا شايل مسؤولية 50 أو 60 فرد، بين فرقتي والناس اللي شغاله معايا".

الناس بيقولو فلوسي حرام

وتابع كمال حديثه منتقدًا من يشكك في نواياه: "اللي بيقول إن فلوسي حرام، أنا بستخدم الفلوس دي في أعمال خير.. إنتم عملتم إيه؟ لما حد يحتاج يغسل كلى مرتين أو تلاتة في الشهر، مين اللي بيوفرله الفلوس؟".

هبطل أعمل خير 

وفي نهاية حديثه، توجه كمال، بطلب واضح إلى الأزهر، قائلاً: “أنا عايز شيخ من الأزهر يرد عليا ويقولي إذا كنت غلطان ولا صح، لو غلط هبطل أعمل خير”، لافتًا إلى أنه يشعر بالتعب بسبب إن من حين لآخر حد يقول له "الله طيب لا يقبل إلا طيب، وإن ربنا مش هيقبل مني عشان فلوسي حرام".

رسالة مؤثرة

واختتم عمر كمال حديثه برسالة مؤثرة، قائلاً: "أنا واحد من وسط ملايين، شايل مسؤولية عيلتي والناس اللي شغالين معايا، وبوفر العلاج لكل اللي يحتاج، أتمنى إن المجتمع كله يبقى زي عمر كمال، ويساعد الآخرين، عشان محدش هيبقى فقير".