بسمة وهبة عن الطبيبة وسام شعيب: "عايزة مشاهدات وتريند"

علقت الإعلامية بسمة وهبة، على أزمة الطبيبة وسام شعيب، التي أثارت جدلا واسعا بعد ما نشرت فيديو عبر حسابها الشخصي وكشفت واقعة حمل حرام داخل عيادتها.

استغلال المرأة المصرية

وانتقدت بسمة وهبة، الطبيبة وسام شعيب، في فيديو عبر حسابها الرسمي على "إنستجرام"، قائلة: "طبعا حضرتك يا دكتورة بتقولي أنا ما أسأتش لحد ولا فضحت حد لأنك مقولتيش أسماء، بس استغليتي المرأة المصرية وحطتيها في موضوع يسيئ ليها وده اللي لازم تفهميه لو محدش كان فهمهولك".

الناس هتكشف عندك إزاي 

وأضافت: "التخصص بتاعك فيه 10 آلاف طبيب وطبيبة والناس اللي هتروح للأطباء في التخصص ده وبالأخص في العيادة بتاعتك هتقدر تيجي أي ست وخصوصا في المكان بتاعك أي ست في البحيرة هتيجي تكشف عندك وهي مش متوترة وخايفة منك عشان الناس سمعت كلامك؟".

بتدوري على التريند

وتابعت: "أنتي بتقولي إنك مبتدوريش على التريندات لا أنتي بتدوري على التريند، والدليل إنك بتشتغلي في 6 عيادات، منهم 3 في الإسكتدرية وكفر الدوار، وأنتي بتدوري على الشغل والتريند والدليل حاجتين إنك سايبة الفيديو لحد النهاردة، لازم تقتنعي أنك غلطتي غلط يعاقب عليه القانون".

من نسج الخيال

وأردفت "عايزة تحققي مشاهدات وتعملي تريند، والدليل إنك كاتبة على الفيسبوك أن كشفك بـ20 جنيه وشغالة في 6 أماكن يعني ناحتة الشغلانة، ودلوقتي لو بنتي تعبت وعاوزة أوديها عند دكتورة أمراض نسا وتوليد أوديها إزاي بعد اللي قولتيه ده؟".

جرأة

واختتمت حديثها: "إزاي جاتلك الجرأة إنك تتكلمي على حالة عندك ومعملتيش حساب لمهنتك والقسم اللي أقسمتيه أنك تكوني شريفة فيها، الحقيقة أنا زعلانة منك جدًا ومش عايزة أتخانق معاكي وأنتي غلطتي غلط كبير وأي حد بيشجعك ومتضامن معاكي لأنك متعرفيش ظروف البنت دي إيه مش يمكن اغتصبت؟ طيب ليه مطلبتيش الشرطة ليه؟".