رامي صبري عن تامر حسني: "محدش يعرف يبقى زيه"

أثنى المطرب رامي صبري، على التعاون مع الفنان تامر حسني، وعبر عن ذلك بكلمات رقيقة نشرها عبر حسابه على "فيسبوك". 

وقال رامي في رسالته: "تامر حسني فنان وأخ غالي ومحترم، وواثق في نفسه، ودي للأسف مش موجودة كتير في مغنيين ناجحين، لكن عندهم مشاكل كبيرة وميعرفوش يبقوا زي الراجل المحترم ده".

صفاء نفسي

واعتبر رامي صبري، أن الفنان تامر حسني يمتلك حالة من الصفاء النفسي، يفتقدها هو، وقال: "تامر فنان كبير جدًا، ولما اشتغلت أنا وهو في الديو اللي هينزل الفترة اللي جاية فهمت هو محبوب ليه، علشان عنده صفاء نفسي مش عندي شخصيًا، أنا دايمًا ليا رد فعل إنما هو بيسيب الحاجات زي ما هي ومبيحبش يرد". 

شكرًا تامر حسني

واستكمل رامي صبري: "شكرًا تامر حسني على ذوقك واحترامك ليا في التصوير، ودايمًا كنت تقولي إنت مبسوط إيه رأيك محتاجة حاجة، كل ده مينفعش يطلع غير من فنان حقيقي عنده إحساس بالناس والأهم واثق من نفسه، قريبًا جدًا هتسمعوا أغنية "فعًلا مبيتنسيش".

أغنية جديدة

رامي صبري وتامر حسني، تعاونا في أغنية جديدة تحمل اسم "مبيتنسيش"، كلمات عمر تيام وألحان شادي حسن، وتوزيع طارق توكل، ومن المقرر طرحها في الأيام القليلة المقبلة.

تعليقات حماسية

بمجرد إعلان الثنائي عن الغناء معًا في أغنية جديدة، انهالت تعليقات المتابعين، حيث علق حساب باسم محمد نبيل قائلا: "أكتر مطربين بحبهم.. إن شاء الله حاجة تكسر الدنيا".

وعلق حساب آخر باسم ميشال محسن قائلا: "أنا عايز اقولك إنك مميز عن باقى الفنانين فى نقطة معينة، إنك لما بتيجى تختار لحن أو كلمات أو توزيع بتختاره لينا إحنا وأنا واثق إن الدويتو مع رامى هيكسر الدنيا وأنا فى الانتظار والنجاح الدائم".