في "الفلانتين".. أبطال فيلم حب البنات يوجهون رسالة لـ حنان ترك

استعادت الفنانة ليلى علوي والفنانة هنا شيحة ذكرياتهما مع فيلم “حب البنات” الذي سبق عرضه منذ 21 عامًا، وكان ذلك بالتزامن مع عيد الحب.

وحلت ليلى علوي وهنا شيحة، ضيفتان في برنامج “Spot on”، وقالت ليلى علوي: “إحنا بدأنا تصوير الفيلم بديكور البيت كان في استوديو الأهرام وصورنا كل المشاهد بالترتيب، أول حاجة مشهد الوصية وبعده وأنا واقفة بتفرج على صور بابا اللي على الحيطة".

أول تجربة سينمائية

حب البنات كان التجربة السينمائية الأولى لهنا شيحة، حيث قالت: “كنت مبسوطة جدًا وأول مرة أقف قدام كاميرا سينما، وليلى علوي تبقى بطلة الفيلم وكنت طالعة أختها. واستكملت مازحة: "كنت بنام على حجرها طول الوقت، الفيلم كان خام وكانت ذكريات خطيرة بصراحة”.

مشاهد الأكل

أما عن مشاهد الأكل التي كانت تصنعه ليلى علوي أثناء تصوير الفيلم، قالت ليلى: “الأكل اللي كنا بنعمله في الفيلم كنا بناكله عادي وكنا بنفطر مع الكرو كله بقي فول وطعمية، لكن الحلويات وتورتة طبق الندي بتاعت عيد الحب مأكلنهاش”.

ذكريات الكواليس

واستعادت ليلى علوي ذكرياتها عن كواليس الفيلم، معبرة عن اشتياها لتلك الأيام. وقالت: "حاجات كتير في كواليس الفيلم بنفتقدها، أنا فاكرة إن الديكور كان معمول ما بينا وما بين أشرف عبدالباقي، وكنا نصور عندنا ونروح نستريح في الديكور بتاع أشرف، وكان دايما بيحصل بينا حكايات وضحك كتير".

وأضافت هنا شيحة: “اتعلمت في الفيلم ده حاجات كتير أوي من ليلى علوي وأشرف عبدالباقي واستفادت بيها كأول فيلم سينما ليا”.

جملة ليلى الشهيرة

وعن جملتها الشهيرة في الفيلم “مش شرط يكون اللي بنحبهم هما بس الحبيب والحبيبة ممكن يكون الأب، الأم، الأخت، الصديق، الجار”، علقت ليلى علوي: “الجملة حلوة أوي بدليل إن إحنا بنقولها كل سنة في مناسبة عيد الحب لأن الحب مش لازم بس يبقى بين الولد والبنت أو الراجل والست.. الحب ده للأم والأب والصديق والأخت والجار ولأي حد بنحبه بجد”.

رسالة لـ حنان ترك

كما هنأت ليلى علوي وهنا شيحة، الفنانة حنان ترك في تلك المناسبة والتي شاركتهما بطولة فيلم “حب البنات” وكانت الأخت الثالثة، وقالتا: “وبمناسبة عيد الحب وذكريات الفيلم نحب نقول لحنان تحية كبيرة وبنحبك أوي ووحشتينا أوي وكل سنة وأنتي طيبة وهابي فلانتين ورمضان كريم وكل حاجة حلوة”.