بعد 5 سنين.. أسرار خفية وراء تأخير مسلسل "أشغال شقة جدا"

عبر محمد دياب، شقيق المخرج خالد دياب والمؤلفة شيرين دياب صناع مسلسل “أشغال شقة جدا”، عن سعادته بنجاح المسلسل، كاشفًا عن أسرار وقصة خفية وراء ذلك النجاح الكبير الذي حققه المسلسل.

مسلسل أشغال شقة

وكتب محمد دياب عبر حسابه الشخصي على موقع “فيسبوك”: “الحمد لله أشغال شقة للسنة التانية ينجح نجاح ساحق، بس ورا النجاح ده قصة.. أشغال شقة ده لمدة خمس سنين بيتعرض على منتجين مصر كلهم ولكن مكانش فيه حماس ليه، تقريبا معظم ممثلين مصر رفضوه رجاله وستات”.

وأضاف دياب: “مرة نجم كبير تحمسله ومضاه فضل يطلب تغييرات لدرجة إنه في الآخر طلب إن شغل البطل يتغير وتتشال فكرة الشغالات”.

رد الفعل على مسلسل أشغال شقة جدا

وعن فكرة المسلسل قبل عرضه قال: “في ناس مكانتش عاجباها الفكرة وناس كانت شايفة إننا بنكتب جد فمش هنعرف نعمل كوميدي، وناس عايزة الفكرة بس اللي يخرجها حد تاني غير خالد”.

واستكمل: “رد الفعل ده كان هيجنن خالد وشيرين، إحساس صعب لما تبقى مؤمن بحاجة واللي حواليك مش شايفنها، ساعات ده بيشككك في نفسك”.

وأشار دياب أثناء حديثه: “أربع سنين تعدي ومينزلش لخالد وشيرين أي مشروع، الضغط خلي خالد يقبل إن أشغال شقه يتعمل ولو بمخرج تاني، خالد لأي حد يعرفه هو أكتر إنسان كوميدي تقدر تعرفه وأنا وشيرين كان عندنا قناعة إنه من أشغال شقة هيطلع كوميديته الخاصة اللي هتكسر الدنيا”.

هشام ماجد

وأكمل شقيق خالد دياب: “بصعوبة شديدة رجع خالد وشيرين يحاولوا ورا المسلسل، لغاية لما جه هشام ماجد اللي آمن بيه وبخالد كمخرج وجت شركه الإنتاج (آي برودسيرز) اللي هيأتله أسباب النجاح، أشغال شقة نجح واستخدم توليفة كتابية مختلفة مش قايمة على الإيفيهات، وخالد كمخرج طلع عنده صوت وشخصية ورؤية بصرية باينة في كل مشهد”.

نجاح المسلسل

وبالنسبة لنجاح المسلسل فقال دياب: “أنا طول عمري بتفرج علي كوميديا المسلسلات وابتسم كام مرة وأبقي مرضي، بس إن الواحد يضحك بصوت ولغاية لما بطنه توجعه وده يحصل كل حلقة، فمتخيلتهاش تحصل في مسلسل”.

وأضاف: “بالنسبالي المخرج و المؤلف الشاطرين هما اللي بيعملوا حاجة أحس إني معرفش أعملها وأنا لما بتفرج على أشغال شقة ببقى متأكد إني معرفش أعمل منه مشهد.. فعلًا كل تأخيرة وفيها خيرة”.

مواعيد مسلسل أشغال شقة جدا

يعرض مسلسل “أشغال شقة جدا” يوميا طوال شهر رمضان 2025، عبر شاشة قناة "إم بي سي مصر _ MBC مصر" المعروفة، وذلك في تمام الساعة 8:00 مساءً بتوقيت القاهرة.

أبطال مسلسل أشغال شقة جدا

يضم مسلسل “أشغال شقة جدا” كوكبة من نجوم الدراما، على رأسهم الفنان هشام ماجد والفنانة أسماء جلال، بالإضافة إلى كل من:

• مصطفى غريب
• حازم إيهاب
• دنيا ماهر
• محمد محمود
• سلوى محمد علي
• إنجي وجدان

والمسلسل من تأليف خالد دياب وشيرين دياب ومن إخراج خالد دياب.

قصة مسلسل أشغال شقة جدا

وتدور أحداث مسلسل أشغال شقة جدا حول صراع بين زوجين يجسدهما (هشام ماجد، وأسماء جلال) في إطار كوميدي خلال رحلة طويلة عن للبحث عن مربية جيدة لطفلهما، بجانب إدارة شؤون المنزل، وتتوالى الأحداث في إطار لايت كوميدي شيق.