استشاري نفسي يوضح حدود الفضفضة الآمنة على السوشيال ميديا

حذر الدكتور نبيل القط، استشاري الطب النفسي، من مخاطر الفضفضة ومشاركة التفاصيل الشخصية على وسائل التواصل الاجتماعي، مؤكدًا أنها قد تؤدي إلى تفاقم المشكلات النفسية وزيادة الشعور بالإيذاء.

وأوضح القط خلال حواره ببرنامج "الستات" على قناة النهار، الطريقة والحدود الآمنة للفضفضة بعيدًا عن العالم الافتراضي، متابعًا: "الفضفضة على السوشيال ميديا خطر وممكن تزود الإيذاء النفسي، وممكن تعقد الأمور أكتر".

وأوضح استشاري الطب النفسي أن طبيعة السوشيال ميديا المنفتحة على جمهور واسع وغير متجانس تجعلها بيئة غير آمنة لمشاركة المشاعر والأفكار الخاصة.

وأشار إلى أن "أغلب الناس بيفهموا الكلام غلط، وبيستقبلوا الكلام في مناطق تخصهم هم شخصيًا ما تخصش الطرف اللي بيتكلم".

واستطرد قائلًا: "أنا لما أقول أنا زعلان من بابا، في حد هيفتكر إن بابا ضربني أو اعتدى عليا جنسيًا أو هجرني أو مهمل في حقي، فترجمة على حسب هو حاسس بإيه على حسب أنا حاسس بإيه".

وتابع الدكتور القط، مبينًا حجم سوء الفهم المحتمل: "تخيلي بتكلمي 100 شخص، 90 شخصا منهم على الأقل مش هيشوفوها زي ما أنتِ بتقولي، وفي 20% أو 10% مش هيفهموا أصلًا الكلام، وفي 10% تانيين احتمال يفهموا الكلام، فتخيلي هيبقى عندك 90% فاهمين الكلام غلط هيعملوا معاكي إيه؟ عشان كده لازم ناخد بالنا إن الفضفضة على السوشيال ميديا خطر، وإعلان احتياجاتنا على السوشيال ميديا خطر، ممكن تتفهم بشكل غلط".

ونوه الدكتور القط بأهمية الحذر الشديد والتحفظ عند مشاركة الأمور الشخصية على الإنترنت، مستشهدًا بمثال مجموعات الدعم المغلقة التي تتبع آليات منظمة لضمان بيئة آمنة للمشاركين.

وأوضح أن هذه المجموعات غالبًا ما تعتمد على نماذج استبيان لتحديد احتياجات الأعضاء وتوقعاتهم، مع الحرص على عدم تصوير أو نشر ما يدور بداخلها لضمان الخصوصية والثقة.

عزوف الرجال عن الفضفضة

وفي تحليله عن أسباب عزوف الرجال عن الفضفضة العلنية، أشار الدكتور نبيل القط إلى الدور الذي تلعبه التربية في تنشئة الذكور على كبت مشاعرهم وإظهار القوة والصلابة دائمًا.

وقال: "أنتوا يا ستات بتربوا الرجالة على إنهم ما يبقوش ضعاف ويبقوا أقوياء وما يعيطوش وما يتهزوش ويبقوا جامدين ويبقوا جدعان، وبالتالي بيكبر الولد وهو لغاية أما يكبر يحس إن هو لازم ما يعيطش وما يبقاش ضعيف ويبقى قوي دائمًا ويبقى واثق في نفسه دائمًا وما يتهزش، وبالتالي مش هييجي يقعد يعيط أو يتكلم قدام".

وأكد أن هذا الكبت يؤثر سلبًا على صحة الرجال، موضحًا أن الإحصائيات تشير إلى أن النساء يتمتعن بصحة أفضل ويعشن أطول من الرجال الذين يكبتون مشاعرهم.