أمل تريد طلاقا: سحلني لما نسيت أشتريله سجاير وأهلي طردوني

أقامت "أمل" دعوى طلاق للضرر ضد زوجها أمام محكمة الأسرة، مُطالبة فيها بالتفريق بينها وبين زوجها لاستحالة العشرة؛ لتعديه عليها بالضرب والسحل أمام صغارها.  

وقالت "أمل"، البالغة من العمر 39 سنة، في الدعوى التي تحمل رقم 1659 لسنة 2023، إن زوجها كان يحبها في بداية الزواج، ولكن حدثت خلافات جعلت الأمور تسوء بينهما، بدأت باكتشافها تعاطيه المواد المخدرة.

الزوج مدمن

بعد مرور شهور على الزواج، توجهت إلى مصحة لعلاج الإدمان "نزلت دوّرت على شغل عشان أصرف على علاجه بالمصحة، كل أملي أنه يبقى كويس ويرجع ليا ولبيته وينصلح حاله".

ضرب الزوجة

وأضافت أنها عقب مرور شهر ونصف على علاجه وعودته للعمل قررت التوقف عن العمل والجلوس بالمنزل لتدير شؤون منزلها، ولكنه رفض وأصرّ أن تستمر في العمل "قالي اشتغلي وهاتي لقمتك وأكل عيالك أنا مش حمل مصاريف، وأنا أم لطفلين هجيب لكل دا منين، عيالي بيدرسوا ومحتاجين فلوس دروس ودول عياله برضه مش عيالي لوحدي".

واستكملت "أهلي لما طلبت منهم استلف فلوس بس لحد ما الدنيا تتحسن، قفلوا الباب في وشي، وقالولي دا اختيارك من البداية اتحملي، معرفتش أتكلم لأنه فعلا اختياري.. طلبت الطلاق منه كتير لكنه قالي هيرميني في الشارع حتى عيالي مش هشوفهم".

علبة سجاير السبب

وتابعت "كل يوم كنت بصحي أروح الشغل، وأنا راجعة بجيب له عشاء معايا وسجاير، ولكن في مرة نسيت أجبله سجاير نزل فيا ضرب وسحل وطردني برا الشقة لحد ما أجيبها وأرجع".

واختتمت الزوجة في دعواها "الموضوع بالنسبة لي بقي صعب ومش هقدر أكمل خلاص عشان كدا لجأت لمحكمة الأسرة وأقمت دعوى طلاق للضرر ضده".