شاهدة عيان تروي القصة الكاملة لصفع بائع العسلية الصغير بالمحلة

شهدت مدينة المحلة الكبرى بمحافظة الغربية، واقعة مؤسفة، حيث تلقى صبي يبيع العسلية في الشارع صفعة على وجهه من أحد الأشخاص.

القصة الكاملة لتعدي شاب على صغير بالمحلة

نشرت سيدة تُدعى “روجينا محرز” تفاصيل الواقعة باعتبارها شاهدة عيان عليها، من خلال منشور عبر حسابها بموقع “فيسبوك”: “أنا أول مرة أنزّل حاجة زي دي في حياتي أو أنزل مواقف أصلًا، أنا بعيدة كل البعد عن إني أنزل فيديوهات أو أعمل حتى فيديوهات، لحد ما شوفت حاجة أنا مش قادرة أصدقها ولا أسكت”.

وتابعت: “الأستاذ راكب عربية وشکله شاب محترم جدًا، أنا واقفة في الشارع تحت بيتنا شوفت الولد دا بيبيع عسلية وبيعرض على واحد وبيخبّط له عادي على الإزاز، اتصدمت إن صاحب العربية نزل ضـربه كام قلم على وشه كأنه بيضرب راجل كبير والولد غلبان”.

وأضافت روجينا: “ملحقتش أصوّر الاعتداء والناس كلها والشارع شاهد، واللي عصبني أكتر إن في راجل واقف يدافع وبيقول خلاص، فبقول له هو لو ابنك تقبل حد يعمل فيه كدا؟ وصاحب العربية كانت حِجته إنه خبط له على إزاز العربية جامد”.

وأنهت حديثها بقولها: “أنا بنتي الصغيرة قاعدة تكرّر الكلام وتقول لي ضرب الولد على وشه يا ماما، والناس وقفت تراضي الولد الصغير.. دا يرضي مين بجد؟… لو دا ابنك في يوم من الأيام تقبل حد يمد إيده عليه بالشكل دا؟.. وست وقفت تقول له هو عشان غلبان تعمل فيه كدا؟.. أنا بجد مش قادره أتخيل اللي شوفته”.

جدير بالذكر، أن أجهزة الأمن بوزارة الداخلية تفحص الفيديو الذي نشرته السيدة، وأفادت فيه بتعدي شاب على صبي يبيع العسلية بأحد الشوارع في مدينة المحلة الكبرى بمحافظة الغربية.