"نزال" إحدى فتيات حادث طريق الواحات: "واحد من اللي أنقذونا سرقنا"

كشفت “نزال” إحدى الفتيات الثلاث المتضررات في واقعة طريق الواحات، تفاصيل جديدة بشأن المطاردة المثيرة، التي انتهت بحادث نتج عنه إصابتها هي وصديقتيها بجروح وكدمات متفرقة بالجسد.

نزال ضحية مطاردة طريق الواحات تكشف التفاصيل

وقالت نزال ضحية حادث طريق الواحات لـ“تليجراف مصر”: “أنا كنت قاعدة في الكافيه أنا وصديقاتي، وبعد ما شربنا القهوة وخرجنا لقيت 3 عربيات طالعين ورايا محاوطين عربيتنا وصاحبتي اللي كانت سايقة توترت بسببهم، خصوصًا إنهم كان بيبدلوا علينا وبيعاكسوا فينا وعاوزين يوقفونا بأي شكل من الأشكال وفضلوا يرموا علينا بعربياتهم".

وأضافت: "رنا صاحبتنا الثالثة كانت بتعيط وخايفة من اللي الشباب بيعملوه معانا لحد ما دخلنا في العربية النقل اللي كانت واقفة على الطريق، والناس خرجونا من العربية وإحنا متبهدلين وهدومنا متقطعة بسبب الحادث، وكنا بنموت".

وأضافت: “اللي مزعلني إن حد من اللي أنقذنا سرق التليفون بتاعي وشنطة هدومي وسرقوا فلوس كتير من شنطة رنا، رغم إنه كان شايفنا بنموت بسبب اللي حصل فينا”.

وأنهت حديثها: “أنا بشكر محمد مصوّر الفيديو لأنه وثق الواقعة وماسبناش خالص، وفضل معانا طول اليوم، وبشكر برضو الست الأردنية اللي راحت معانا المستشفى وفضلت تطمن علينا وكانت قلقانة، وبعد كل اللي حصل دا إحنا عملنا محضر ومش هنسيب حقنا، وعندنا ثقة في ربنا والقضاء المصري إن حقنا هيجي".

أول ظهور لمصور فيديو واقعة الواحات

في تطور جديد بحادث طريق الواحات الذي أسفر عن إصابة عدد من الفتيات، ظهر مصور الواقعة لأول مرة، كاشفًا تفاصيل اللحظات التي تلت الحادث، والمشهد الصعب الذي شهده على الطريق.

وفي تصريحات خاصة لـ"تليجراف مصر"، قال مصور الحادث محمد أبو زيد: "الولاد اللي كانوا سايقين العربيات كلهم صغيرين جدًا، ومكنتش متخيل إنهم يعملوا حادثة، وأول ما حصلت الحادثة، نزلت بجري أنا والناس اللي كانت ماشية على الطريق، وكان في عمال واقفين جريوا معانا، والمشهد كان صعب، لأن في بنت منهم الإزاز بتاع العربية دخل في وشها وكانت بتنزف، وخدناهم وجرينا بيهم على المستشفى، وفضلت معاهم للنهاية لو احتاجوني في شهادة أمام جهات التحقيق".

مكنتش متخيل يخلوا البنات تعمل حادثه

وأضاف: "مكانش في إيدي أعمل حاجة غير إني أوثق اللي حصل وأجيب حق البنات، ومكنتش متخيل الموضوع هيوصل لحادث، وبعد التصادم جريت أنا وناس تانية وطلعنا البنات من العربية بالعافية وهما مصابين، وروحت معاهم المستشفى ومسبتهمش".