وائل الفشني يهاجم المهرجانات: "مش فن.. دي سرسجة بوّظت الذوق العام"

شنّ المنشد والمطرب وائل الفشني هجومًا حادًا على أغاني المهرجانات ومطربيها، مؤكدًا أنه لا يعتبر هذا النوع من الغناء فنًا حقيقيًا، وواصفًا من يقدّمونه بـ"السرسجية".

الفشني: المهرجانات أفسدت الذوق العام

وخلال ظهوره في بودكاست "فايق ورايق" مع الإعلامي إبراهيم فايق، قال الفشني: "أغاني المهرجانات مش فن خالص.. ممكن نغنيها في فرح وخلاص، لكن ماينفعش نقول عليها فن".

وأضاف: "المهرجانات بوّظتنا تمامًا، لأن الفكرة بقت إننا نجيب واحد سرسجي، نديه فلوس ونخليه نجم وبرنس وقدوة للشباب.. يبقى كده أنا بوّظت الدنيا".

"ده مش فنان.. ده سرسجي لابس دهب"

واصل الفشني هجومه على بعض مطربي المهرجانات، معربًا عن استيائه من تقديمهم كنماذج يُحتذى بها، وقال:
"إحنا هنكدب على ربنا؟ أنت مش بتجيب فنان، أنت بتجيب سرسجي لابس دهب، وابني عايز يبقى زيه، علشان يركب عربية ويلبس. اللي بيحصل ده بيشوه الذوق العام، وبيصدر صورة غلط عن النجاح والفن الحقيقي".

بداياته مع القرآن.. و"المزيكا" كانت حلمه

كشف وائل الفشني جانبًا إنسانيًا من حياته، مؤكدًا أن بدايته كانت مع القرآن الكريم، حيث كان جده يهيئه ليصبح إمامًا.
وقال: "في الدراسة كنت بحب العربي والدين والتاريخ جدًا، وكنت متفوق بسبب القرآن. جدي كان بيحفّظني وبيقولي أنا بجهزك علشان تبقى من الأئمة وتكمل المشوار.. لكن قلبي كان مع الفن والمزيكا".

وأضاف بأسف: "ما حفظتش القرآن كامل، بس أثره كان كبير في حياتي، وساعدني في فهم اللغة والمشاعر اللي بعبر بيها في الغُنا".

الفشني: الفن المحترم حلال.. ومدح النبي جزء من رسالتي

تحدث الفشني عن رؤيته للفن الذي يقدمه، مشددًا على أن الفن لا يتعارض مع الدين أو القيم إذا كان راقيًا.
وقال: "الفن الحلو المحترم اللي بيرتقي بالذوق حلال.. وأنا بحب المدح في سيدنا النبي ﷺ، والناس عارفة ده كويس، علشان كده قابلين مني الكلمة الحلوة سواء في الحب أو الدراما أو في مدح النبي.. واللي بيعمل ده هو وائل الفشني".

لقبوني بـ"الطفل المعجزة".. و"عم فاروق" أول من اكتشف صوتي

كما روى وائل الفشني ذكريات من طفولته، حين لُقّب بـ"الطفل المعجزة"، وقال: "جدي ماكنش يعرف إني صوتي حلو، لكن عم فاروق، فراش المدرسة، هو أول واحد شجعني، وأصر إنه يكلمه علشان يقنعه إني أغني".

وتابع: "في يوم غنيت قدام المحافظ، وخدت شهادة استثمار بـ10 جنيه، واتشهرت في البلد كلها".