بعد هجوم رضا حامد.. شريف إدريس: لم أفتر عليه ويروح يقاضيني

علق الفنان شريف إدريس على الهجوم المتواصل من قبل الفنان رضا حامد، بعد حديثه عن كواليس مسرحية "بودي جارد"، للزعيم عادل إمام.

وكتب شريف إدريس، عبر حسابه الرسمي بمنصة “فيسبوك”: "طيب آخر حاجة هكتبها في موضوع الزميل، رقم واحد أنا لم أتطاول عليه بحرف، ثانيًا يشهد الله أنني لم أفتر عليه بحرف، لو هو شايف إني افتريت عليه في حرف واحد يروح يقاضيني وأنا مستعد أجيب المسرح كله يشهد على الواقعة".

مش عايز أحرج حد

وتابع: "وأظن في التعليقات في البوست اللي فات فيه ناس كانت حاضرة الواقعة كتبت تعليقات تؤكد حدوثها، وأنا مستعد لكتابة أسامي كل من حضر الواقعة من الزملاء الفنانين، ومستعد أعملهم تاج ومنشن في البوست، بس أنا مش عايز أحرج حد".

الموضوع بالنسبالي اتقفل 

واختتم: "أنا لما كتبت البوست اللي فات كتبته من كتر ماشوفته في برامج بيطلع يكذب، ويفتري على أستاذ عادل إمام، وده كله موجود على يوتيوب وجوجل، شكرا لحضراتكم الموضوع بالنسبالي اتقفل تمامًا".

رد رضا حامد

وأثار الفنان شريف إدريس، جدلًا واسعًا في الوسط الفني، بعد حديثه عن سبب طرد الفنان رضا حامد من مسرحية "بودي جارد" للزعيم عادل إمام.

وأكد شريف، في منشوره عبر "فيسبوك"، أن زعيم الكوميديا قرر طرد رضا حامد من المسرحية بسبب اصطحابه لفتاة في الكواليس وليس بسبب تفاعل الجمهور معه أكثر من عادل إمام.

ووجه رضا حامد رسالة لـ شريف إدريس بعد منشوره الأخير، قائلًا: "عايز يتشهر، ولا أعرفه ولا اسمه ولا شكله، وده يمكن كان جاي يعمل دور مساعد، وجه يوم أو اتنين، الله أعلم إذا كان جه ولا لأ، وأنا معروف عني في الشارع المصري إني فنان محترم، والناس بتقولي انت فنان محترم، ميحاولش يشوه سمعتي وتاريخي البسيط، بشوية كلام معرفش مين اللي زقه",

وتابع: "هو إنسان مأجور، وأنا عمري ما أعمل كده، ولو كان حصل كده من ساعتها كان عمل ضجة في المسرح، والدنيا اتقلبت، والخلاف كان شخصي بيني وبين الأستاذ وخلص ساعتها، وهو هرم كبير".